K A T A H O M

 hiyas nga naangkon, dayag natong masud-ongan nga mobathay, 
una kining makita sa panagway, sa kasingkasing dili masalikway, 

mahimong tawagon ang bulak nga kyuom, bulak ikaw matahom
sa sayong kabuntagon, hawiran mo ako aron dad-on sa katulogon.

dinhi sa hardin, ikaw bulak ang kanunay kong singohon, simhoton.
sa taas nakong panaw, mahandom ko ang tami-is mong pahiyom. 

Si Dodong nananghid, "Day, molakaw nako."


Tubag ni Inday, "Sige, lakaw na. Dili ka man magpahawid."

"Ayaw kabalaka Day, ayaw lang ug taboni kay akong balikon." nagngisi si Dodong nga namulong. 

Nahingangha si Inday, "Unsay ayaw taboni kay imong balikon?

"Ah, ang imo bang kasingkasing. Basin ug matak-opan."

"Sus, kanunay man bitaw ning abli. Bisan karon abli kaayo." dala sulirap nga tinan-awan ngadto ni Dodong. 

"Ngee, ayaw sa Day, mangita sa ta ug pamugas, delikado, mahutdan nako ug kusog kon sigehon nako ug tugkad ang imong katahom." dayong lakaw palayo.