K U O T

buhat nga maglambigit ug inabtik sa kamot

ug hunahuna'ng mouliot, mahimo ang kuot

kon ikaw gihatagan ug kiat nga kamot,

ug  hunahuna nga mopalusot, mopahuot,

mohatag kini ug kahigayonan aron makuha ang

usa ka butang ug pagbati sa usa ka linalang.

Lawom ang kahulogan sa pulong kuot,

sama ka lawom sa butang nga gikuot.

Usa ka gabii, si Toldo nangamoral ngadto ni Cristy, 

"Ehem, Cristy, nangalimyon ka sa kamadanihon, 

makadani ang ngabil mong giagakay sa  tam-is nga pahiyom, 

ubos ning bulanong kagabhion, tugoti nga kuoton 

ko ang imong kahilom ug ikaw akong tugawon. 

"Grabiha sab nimo modiga Toldo oi, dili man pud ko kabalibad nimo."

ni Cristy nga dili makaharong ug tan-aw ni Toldo, medyo nahilaw.

"Cristy, mahimo bang kuoton  ko?"

"Hala, si Toldo kalawom gud nimo ron ug mga pulong,"

"Bitaw, Day Cristy pwede ba? 

"Sige Toldo, andam na ko." ni Cristy nga nagpiyong. May gikahinaman.

Si Toldo nibarog ug kalit. "Ay, salamat Cristy, mahimo na diay."

"Unsay buot mong ipasabot?  

"Ang ako bang balak, pwede na. Nagpraktis ko para sa bangga sa balak  nga akong apilan ugma.    Salamat kaayo  ha." pulong ni Toldo nga malipayong nilakaw biya.  Nagngisi mipunit ni Dogie. 

"Ngeek!"