Kaban ni Atty. J. B. Jimenez: ANG BABAYENG ESTRANGHERA SA FLIGHT JB-319

1

NAUNSA BA KINING AKONG DUGHAN ?

NGA MORA KINTAHAY UG BUMUBUTONG BULKAN,

NAG KULBA' KULBA', DI KO SARANG MASABTAN,

TUNGOD NING MATAHOM SA AKONG ATUBANGAN,

NAG-ALINTABO ANG KAHIGWAOS NING BALATIAN,

MORA MAN GAYOD UG AKO SIYANG NA-ILHAN ?

2

Dinhi Sa New York, Sa JFK ning tugpahanan,

Naglingkod nga hamili-on sa tanan,

Sa itom nga salamin ang hulagway gitabonan,

Apan maaninaw ang iyang Larawan,

Gi-agak sa usa ka batan-on nga ambongan,

Apo niya sumala sa ilang mga pinulongan.

3

Hamtong, apan wala tikyopi sa panuigon,

Ang kaanyag sa Iyang MalaDyosa nga Bayhon,

Bisan ug may Naga Agak, Barog Nga Harianon,

Dali Mong Masud-ong Ang Iyang Pagka Halangdon,

May Dignidad Ang Lihok, Talahuron,

Apan Ang Hulagway Daw Masulob-on.

4

Unya sa dihang diha na kami sa Sakyanan,

Nga Milupad Na Sa Kapunawpunawan,

Mga Pulong Nya Akong Hibatian,

Kining Maong Flight Kono Iyang Nahinumdoman,

Ang Una Niyang Pagkuyog Sa Lalakeng Iyang Giunongan,

Nga Mao Kono Sa Batan-on Ang Tinuod Nyang Apohan.

5

Gibati Akog Tumang Kalibog Ug Katingala,

Kon Kinsa Ba Gayod Kining Binuhata,

Matud Nya Wala Daw Masayod Ang Iyang Gihigugma,

Nga Ang Ilang Gugma, May Binhi Nga Namunga,

Sa Batan-ong Apo, Ang Maong Bunga, mao Ang Iyang Mama,

Handomanan sa Lalakeng, Iyang Gi-amoma.

6

Unya' Sa Tuman Kong Kahigwaos, Kakulba',

Namatud-an Kong Siya Ang Dugay Ko Nang Gipangita',

Ug Bisan Karon Daw Dili Na Siya Maka Kita',

Buot Ko Siyang Hagkan, Gakson Ug Kulopugan Unta',

Bisan Sa Dagahang Mga Tuig Nga Nangalarag Ug Nadugta',

Buot Ko Syang Mahimamat Pag-usab, Ug Masuta'.

7

Busa' Ning Maong Gutlo, Ibabaw Sa Mga Panganod,

Buot Kong Siyang Hakpon Ug Sa Paraiso Ihatod,

Mao Na Kini Ang Gutlo' Nga Gipaabot Hangtod Sa Hangtod,

Siya Ang Babayeng Natungdan Sa Mga Luha' Kong Nagtubod,

Siya Ang Linalang Nga Mga Gabii Kong Maigang, Nakahumod,

Siya Ang Babayeng Ikuyog Ko Sa Tanang Bungtod Ug Lawod.

8

WALA GAYOD DIAY TIKYOPI SA PANAHON,

ANG GUGMANG GIIYA IYA NAMO PAGHAMBIN SA PANAHON,

BUOT KO NA SIYANG DUOLON UG GAKSON,

BUOT KO NANG IPA-ILA ANG AKONG KAUGALINGON,

APAN SA DIHA NGA AKO NA SIYANG, SA MGA HALOK DIGUON,

NAHIGMATA AKO SA USA KA DAMGO, USA RA DIAY KA DAMAN INTAWON.




(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)