Kaban ni Atty. J. B. Jimenez: KON IKAW NAHISUKAMOD... BANGON!!!

Bangon!!!

Nakita Ko Ang Mga Dragon Ug Halas,

Nga Nahapatik Sa Imong Lawas,

Nadungog Ko ang Imong Sugilanon,

Pagtamay Sa Katilingbang Mapahitas-on,

Nakita Ko Ang Pagtulo' Sa Imong Luha',

Pagbakho Sa Mga Nabuak Nga Paninguha,

Apan Sa Kilid Sa Imong Hulagway,

Nasil-ingan Ko Nga Di Ka Modagan Sa Away,

Kay Dakong Sangka' ang Kinabuhi,

Kamatuoran Batok Sa Mga Pagbudhi.

Sa Imong Baroganan, Akong Namatud-an,

Nga Kon Mahisukamod Ka Ning Kalibotan,

Mobangon Ka Ug Mopadayon Sa Misyon,

Diki Moatras, Pas-an ang Pagsalig Nga Gisangon,

Nakita Ko Ang Kahangkob Ug Kaaisog,

Nga Dili Basta Matumba Ug Mauyog,

Kon Mahisakamod Man Tungod Sa Bangis Nga Hangin,

Mobarog Pag Usab Bitbit Ang Mga Panalangin,

Sa Matag Kagun-ob Sa Imong Gitukod,

Itarok Mo Pag Usab Bisan Pag Mahisukamod.

(Bug-os ang pasalamat sa  KAHAYAG  ngadto sa nagsulat sa  garay   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)