Kaban ni Atty. J. B. Jimenez: LAMPINGASANG KASINGKASING (alang sa mga badlongon)

Gigun-ob Mo Ang Akong Kalibotan,

Giutingkay Mo Ang Akong Kaugalingnan,

Giukay Mo Man Gani Hangtod Ang Akong Baroganan,

Unya Human Mo Masamok Hangtod Sa Kinauyokan,

Imo Na Lamang Ako Nga Gitalikdan. . . .

PagKa Way Puangod, Pagka Lampingasan...

Hangtod Ang Kinahiladman Ko Imong Gitugkad,

Ang Tanang Kong Tinipigan, Imo Ganing Gibukhad,

Gilukop Mo Pag Suta Ang  Suok Sa Kasinatian Kong Halapad,

Hangtod Ang Gilubong Ko Na Sa Dugay Imo Pang Gihukad,

Unya Human Mo Mapahimusli ang Tanang Akong Gimanggad,

Nagpaila Ka Nga Salingkapaw Lamang Ug Dili Molungtad.

Nganong Hilabihan Ka Tunokon Ang Imong Tanlag,

Nganong Daw Mga Punyal Nagtusok Sa Imong Kalag,

Nganong  Ang Konsyensya Mo Daw Nahisalaag,

Nganong Ang Tanan Mong Giduol Nangabungkag,

Unsay Maldisyon Nga Dala Sa Hulagway Mong Naglaspag,

Ug Nganong Gimahal Ko Ika Sa Akong Pagdanghag?

(Bug-os ang pasalamat sa  KAHAYAG  ngadto sa nagsulat sa  garay   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)