Kaban ni Inting Botikol (JSL): KALAMPOSAN LUYO SA MGA PAG-ANTOS

      “Paningkamot gyud Simo sa imong pag-eskwela, ayaw’g apil-apil anang hugoy-hugoy sa barkada labi na gyud nang paglunang sa guinadiling bisyo sa druga.” pahimangno nga dalang tambag ni Tikya ngadto sa kamagwangang  anak samtang naglung-ag ug saging ug kamote aron ilibod  sa ilang dapit.

        Duha ka buok anak niya kang Dolpo nga taud-taud nang mitaliwan ngadto sa laing kalibutan gumikan sa sakit nga pasmo’s kusog  ug nerbiyos,  pun-an pa sa bisyong walay puas nga pagyumyom sa  Tanduay 65 bisan ug wala pay sulod  ang tiyan sa sayong kabuntagon.

 “Ayaw kabalaka Nay,  magtinarong ko sa akong pagtungha bisan ug gagmay ko’g grado basta pasado lang.” tubag pa ni Simo ngadto sa iyang inahan nga nagkapuliki ug huyop sa ilang abuhan nga gama sa tulo ka mga dagkung bato ang sug-angan.

        Hapit na matapos si Simo sa hayskol sa eskwelahan sa ilang lungsod.

    Kon wala siyay klase, makasapi siya ug ginagmay pinaagi sa pagpanghugas ug mga sakyanan kon “carwash”.

         Iyang manghod si Boy nga singko anyos pa ang edad. Pilay estorya nakagradwar gyud si Simo sa hayskol.

      “Simo, lisod gayud kaayo ang atong panginabuhi. Wala koy  ikasarang sa paggasto kanimo sa kolehiyo. Husto na seguro ang imong grado nga nakab-ot.” pamahayag sa iyang inahan usa ka higayon  niana nga bag-ohay pa silang nakapanihapon.

     “Sige lang Nay, mag working student lang ko para libre ko sa tuition fee sa kolehiyo.” tubag ni Simo nga nagkadusingot human gitunibig niya ug higop ang siniliang sabaw sa tinuwang tambasakan  nga maoy iyang paboritong sud-an.

    Tuod man, nadawat si Simo  isip usa ka working student sa eskwelahan sa kolehiyo sa ilang lungsod.  Wala siya mawagtangi ug kasibot sa pagtuon ug pagkakugihan.  Sayod si Simo  nga mao lamang kini ang iyang yawe nga magdala kaniya sa hayag niyang kaugmaon.

       Accountancy ang kursong iyang gikuha kay arang-arang man siya sa math ug arithmetic.

     Na-assign siya sa library ug kon dili “busy”, makalugar gyud siya ug basa sa ilang mga textbooks.

        Dali ra ang panahon nga miligid. Nakatapos gyud si Simo sa Accountancy.

         Kumo kay anhi ra man sa Sugbo ang “Board Exam”, misulay si Simo ug kuha ug Board, kon pasulit  basin na lang kon makataghap.

     Gibuligan gyud  siya sa kapalaran kay sa pag “release” na sa resulta, usa siya sa nakapasar.

            Certified Public Accountant kon CPA na si Simo. Milugmaw ang mga luha sa kalipay ni Simo ug ni Nanay Tikya niya sa ilang mga kaapingan.

    “Salamat sa Diyos. Simo,  nakab-otan gyud nimo ang imong damgo anak.” malipayong pamulong ni Tikya.

     Nakasulod dayon siya ug trabaho sa usa ka dakung kompaniya diin dako sab ang hatag nga suhol.  

         Nahaw-as na sila si Simo sa pagka pordoy ug sa hilabihang pagka rabanit sama sa usa ka ilagang pawot.

   Ang kakukigan ug walay hunong nga pagsandig sa maayong tigbayon ug  binuhatan maoy nakahatag ug sugnod aron makab-otan niya ang kalampusan luyo sa mga pag-antos. (KATAPUSAN). 

(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos. Napatik sa Banat News kining maong sugilagming karong adlawa, Mayo 6, 2012).