Kaban ni Inting Botikol: NAKAAMGO SI ISLAW

Tabi diha Doray ayaw’g babag sa pultahan kay moagi ko tingali’g ma-late nako sa trabaho. Nanimaho ka lang kwaknit, banghag pa ni Islaw ngadto sa iyang asawa usa ka buntag niana.

 “Doray na ron apan kaniadto sa naninguha ka pa kanako Dory gyud ang isangpit mo kanako,” tubag pa ni Doray nga kusmod kaayo ang nawong ngadto sa iyang bana nga talilakaw na padulong sa trabaho.

Midugang pa siya, nanimaho nang kuwaknit kay tagbaw na man apan kaniadto sa bag-ohay pa tang puyo mamugos gyud ka’g hawok lakip na sa akong bilahan bisan og walay ligo.”

Wala na lang motubag niini si Islaw ug mipaturatoy sa paglakaw padulong sa trabaho. Unom na ka buok ang ilang mga anak kay sundanon man kini si Doray. Ang tulo niini sayo kaayong nangahalin kon nangaminyo ug ang laing tulo nag-eskuyla pa sa elementarya sa eskuylahan sa ilang baryo.

Nahikalimot na lang siya sa pagpanghindik kay kahibalo na man ta sa gimbuhaton sa usa ka ginang sa panimalay ug nagbuhi pa gyud si Doray og usa ka buok anay nga baboy basin na lang makatabang-tabang kini sa ilang kahimtang matag karon ug unya.

Mahal na baya karon ang baktin mokabat na’g dos mil ka pesos ang matag buok niini. Nakapaniid si Doray nga nagadala-dala ra ba ni si Islaw nga iyang bana og condom isip proteksiyon sa kagaw ug sa uban pang matang nga sakit sa mga kababayen-an karong panahona.

Gumikan sa kadali rang moligid ang panahon wala lang damha nga nanganak ang anay ni Doray. Dose ka buok baktin ang anak niini apan namatay ang duha entonses napulo gyud ang tanang buhi.

Nakakuwarta si Doray sa iyang kabudlay ug kahago. Mao tong mipalit siya og short pants nga pakigol, mga paguwapa sa Avon products sama sa pahumot, lipstick ug cream alang sa iyang nawong.

Mipalit usab siya og blouse nga bagay sa iyang short pants nga pakigol. Usa ka adlaw niana, nahikurat ug nahibulong si Islaw sa pag-uli niya gikan sa trabaho nga seksi na man ang iyang asawa nga si Doray sa iyang short nga pakigol, sinaw na ang mga kuko, pula-pula ang aping ug labaw sa tanan nangalimyon siya sa kahumot.

Miduol siya sa iyang asawa ug midip-ig gyud pag-ayo.  Naghinamhinam si Islaw. Nanginit ug nagpamahit sa iyang wait  si Islaw labi na  nga iyang nahanggapan ang pahumot ni Doray.

“Uy, Islaw ayaw’g duol nako kay nanimaho na ra ba kong kuwaknit,” pulong pa nga nagdala og kantalita ang tingog ni Doray.

Nalumoy si Doray 

“Ayaw’g tagda tong mga sulting dugmok Doray kay lab-ason nato karong mga gutloa ang atong gugma.” pakiluoy pa ni Islaw dayong bukot sa iyang mga bukton ngadto ni Doray. Nalantawan na ni Islaw ang dakong bugno sa mga bungoton nga iyang atubangon uban sa iyang asawa.  Nakaamgo si Islaw sa kamadanihon ni Doray. 

Nalumoy si Doray ug nanulod sila sa ilang kuwarto aron sa makausa pa dimdimon nila ang dugos sa lawasnong kahinam ug kalipay ug katkaton pa gyud nila ang ikapitong bukid sa himaya sama niadtong bag-ohay pa lang sila nga naminyo! (Kataposan)








(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos.  Nigawas kining maong sugilagming kaniadto sa Banat News sa isyo Hulyo  7,  2011).