KATUNGOD SA PAGPADAYAG

 Kini maoy hinagiban sa mga linalang nga nagdawat ug nagtagagtam sa kagawasan sa pagpagawas sa iyang gibati pinaagi sa mga pulong nga mabasa ug madungog...

Ang dili pagpadayag sa hunahuna, mahitabo kon sagulan ug pagduhaduha, pagukon-ukon ug pagkamanggiuwawon. Mahimong babag usab sa katungod sa pagpadayag sa hunahuna ang kakulang sa kaisog ug kahibalo sa butang nga angayang ipadayag aron sa hustong  buhat ug pulong masabak ug ikapasibantog. 

Sama sa ubang katungod, ang  kagawasan ug katungod  sa pagpadayag may kinutoban, dili kini magamit aron pagpakaulaw sa isig ka tawo ug labi pang dili kini mahimong sumbanan sa dili maayong panag-ingnan nga makadaut sa dungog sa isig ka tawo. 

Dili usab kini mahimong tuburan sa pagpangabuso. Ang pagpadayag usa ka epektibong matang sa pagpahibalo sa imong hunahuna nga makahatag ug maayong pagtulon-an ubos sa mithing panaghigalaay ug panagtambayayong.

"Dong, mabungol man ko sa imong kahilom. Unsa man mangulitawo ka nako? Dia pa ra ba ni akong masuso akong patutyon?" ni Inday nga napul-an na gyud ug hinuwat ni Dong.

"Day,  pasensiyahe gyud, pero maamang man ko kon moabot na ta niining panahona." nagduko si Dong nga namulong. 

"Sige na gud. Sulti na. Kay gabii na kaayo. Nagduka na ko."

"Bitaw Day, pahuwama lang ko diha ug kwarta para akong ipamilete, nakuotan man gud ko pagpadung nako dinhi sa inyoha ganina. Mupauli dayon ko. Sabta lang ko ha sa akong kapit-os ning  halawom nang kagabhion."

Human makahulam ug pamilete, "Alanganin man gyud ko ni Inday. Kon kami rang duha, sayon ra kaayo akong pagtagad ngadto kaniya. Apan, kon magkugos na gani siya sa iyang masuso, mausab man ko.  Ah, akong ipaagi sa buhat ang tanan. Ugma puhon, sa akong pagbalik, akong dad-an ug usa ka pungpong bulak si Inday. Ang bulak maoy mopabuhagay sa akong katungod sa pagpadayag sa tinuod kong gibati ni Inday.  He, he, he."