Kaban ni Atty. J. B. Jimenez: ANG MGA MAKALILIMOS...PAGKA-ALAUT...!!!!!

 Daw Nagpakilooy Ang Imong Mga Tinan-awan,

Nga Nagsud-ong Sa Nagpasulabing Katilingban,

Dunot Ug Gision Na Ang Imong Mga Paglaum,

Nagkagidlay Ang Damgong Wa Na Nimo Mahandom,

May Mga Pagmahay Sa Imong Mga Panghupaw,

Sa Imong Kahiubos, Kaligotgot Maoy Misapaw,

Nagkabolingit Na Ang Imong Pagsalig Sa Uban,

Nagkalapok Na Gani Ang Natuis Mong Tingusbawan.

Sa Mga Kamot Mong Way Hunaw, Palad Mo Daw Nahanaw,

Gituyhad Mo Ang Kamot Kay Limos Ang Imong Gitan-aw,

Apan Ang Mga Halangdon Way Panahong Molingi Kanimo,

Nanagdali Ang Mga Gamhanan Sa Lakaw Nga Way Ritmo,

Wala Na Gani Ing Buot Maminaw Sa Napagaw Mong Awit,

Wala Nay Buot Mosiplat Sa Gitara Mong Pinunit,

Kanang Imong Maniwang Nga Nga Lawas Ug Katarongan,

Sa Mata Sa Mga Hamili, Mga Basura Lang Sa Kalibotan.

Nagpalimos Ka, Sa Pagsabot Sa Katilingbang Taas Ug Lupad,

Wala Nay Molingi Kanimo, Ang Kadaghanan Milubad,

Nagpalimos Kag Kalooy Sa Linalang Nga Daw Way Suliran Sa Kinabuhi,

Apan Inay Kalooy Ang Nadawat Mo, Mga Tamihid Ug Pagbudhi,

Nagpalimos Ka Sa Pasaylo ' Sa Mga Tawong Walay Baroganan,

Apan Walay Ika Gasa Nga Momho Ang Hakog Nga Kalibotan,

Wala Nay Nahabiling Kalooy Sa Mga Tawong Adunahan,

Kon Buta Sa Kamatuoran Ang Mga Hamili Ug Gamhanan,

Ikaw Nga Nakakita, Unsa May Imong Mahimo Taliwala Ning Tanan ?

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).