Kaban ni Atty. J. B. Jimenez: DAVAO, SA AKONG PAGBALIK HUMAN SA KAPID-AN NGA KATUIGAN

Pagka dako' sa Kausaban, Human

Sa Paglabay Sa Kapid-ang Katuigan,

Pagkalayo Na Ug Pagka Daghan,

Sa Kausaban Ug Kauswagan,

Kon Mga Panggawas Nga Timailhan,

Maoy Bugtong Nga Sumbanan,

Apan Diay Luyo Niining Tanan,

Ang Kakabus Sa Katawhan,

Misamot Ka Hilabihan,

Kalisod Sa Pagkakitaan.

Nagtinas-anay ang mga balay Patigayon,

Nag inilogay sa agianan ang mga transportasyon,

Tanang mga kahimanan sa modernong komunikasyon,

Ang Davao wala mahibiyai sa bul-og sa Panahon,

Apan Lagi Ang Mga kabus Labihang Gaghan gihapon,

Mga Makalilimos Nangaliyupo alang Sa Panihapon,

Samtang Ang Dakbayan Nag-una Sa Modernisasyon,

Ang Mga Timawa Halos Walay Pagkaon,

Ang Davao Wala Malahi Sa Tibuok Nasyon,

Adunahan Apan Naglisod Ang Populasyon.

Ang Kinabuhi Sa Atong Nasod,

Maingong Tang Hayahay Bisan Ug Lisod,

Kining Davao Nga Maoy Usa Ka Tipak Sa Tinuod,

Nakahatag Kanako Ug Kahiamgo Ug Kahimangod.

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).