Kaban ni Atty. J. B. Jimenez: KARONG ADLAWA, HINGINLAN KO ANG KASUB-ANAN...

 

Karong Adlawa, Atubangon Ko Ang Banagbanag,

Lantawon Ko Ang Usa Ka Adlaw Sa Iyang Kasanag,

Iwakli Ko Ang Mga Dag-om Nga Nagahulga Kaniya,

Ug Ilisan Ko Ang Dulom Sa Paglaum Ug Mga Pangaliya,

Anak Ako Sa Langitnong Amahan Mao Nga Ako Adunahan,

Manununod Ako Sa Bahandi Nga Malungtaron Ug Balaan,

Wala Akoy Gikahadlokan Ug Wala Akoy Mga Kahiubos,

Kay May Gahom Ang Akong Amahan Nga Mosumpo Sa Kakabus.

Sa Akong PagLawig Ning Kalibotan Nga Malinlangon,

Giubayan Ako Sa Espiritong Gamhanan Ug Langitnon,

May Kusog Ako Aron Sumpoon ang Tanang Babag,

Ug Dili Tugotan Sa Langit Nga Ako Matibulaag,

Hinigugma Ako Sa Akong Tigpanalipod Ug Manunubos,

Hugasan Niya Ang Balatian Ko Sa Kasub-anan Ug Kahiubos,

Wala Akoy Mga Kalissang Ug Bisan Unsa Nga Kahadlok,

Kay Siya Ang Iwag Ug Abyan Sa Akong Pangandoy Ug Mga Lihok.

Panalipdan Niya Ang Akong Mga Mahal Sa Kinabuhi,

Iiway Niya Sa Mga Kadaot, Pagdumot Ug Pagbudhi,

Sa Akong Buhatan. Hiusahon Niya Ang Tanang Mga Kauban,

Wagtangon Ang Mga Bingkilbingkil Ug Mga Pagtakuban,

Sa Akong Panginabuhi, Iya Akong Punuon Sa Grasya,

Ug Luwason Niya Ang Tanan Kong Mga Mahal Sa Disgrasya,

Karong Adlawa, Hinginlan Ko ang Tanang Kasub-anan,

Ihalad Ko Ang Akong Gugma Ug Pagsalig Alang Sa Langitnon Kong Amahan.

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).