Kaban ni Atty. J. B. Jimenez; MAMUMUONG PILIPINO, MABUHI KA....!!!!!!

1

Bug-at Ang Gipas-an Mong Katungdanan,

Lisod Ang Mga Giliot Liot Mong Agianan,

Tungason Ang Tumong Nga Imong Padulngnan,

Daghang Babag Nga Nag Buntaog Sa Imong Dalan,

Gilisod Lisod Ka Sa Usa Ka Hakog Nga Katilingban,

Apan Dalayegon Ang Imong Mga Tingusbawan,

Padayon, Ayaw Panumbalinga Ang Mga Kakulian,

Padayon, Hangtod Makab-ot Mo Ang Kadaugan.

2

Ikaw Ang Gisaligan Sa Banay Mong Ulipon,

Ikaw Ang Gisandigan Sa Mga Pangandoy Nga Gipanagtipon,

Ang Imong Mga Anak Nagpalimos Nalang Aron Makakaon,

Ang Imong Mga Babaye Nahimong Mga Bulak Nga Palitonon,

Nagpuyo Sa Mga BarongBarong Ang Mga Tiunay Nga Pilipinhon,

Samtang ang Mga Dumuduong Maoy Nag HariHari Karon,

Wala Nay Kapaingnan Ang Mga Kadugo' Mong Lumadnon,

Mga Iskwater Sa Nasod Nilang Kaugalingon.

3

Busa Ayaw I-atras Ang Pakigbisog,

I-abante Ang Mga Tinguha Batok Sa Mga Hakog,

Batokan Ang Mga Mapahitas-ong Manaogdaog,

Ipatigbabaw Ang Baroganan Ug Ang Imong Tingog,

Ayaw Padala Sa Mga Panghasi Ug Pag Ulog Ulog,,

Ayaw Kahadlok Sa Gahom Ug Sa Kusog,

Mamumuong Pilipino, Ang Kawsa Ayaw Isibog,

Padayon, Abante Ang Tinguha Way Huniong, Idas-og.

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).