Kaban ni Atty. J. B. Jimenez: NAGLAGITING ANG KAINIT SA MAYO, GIUHAW SA ULAN SA HUNYO....

 

Nag Alintabo ang Dughan Sa Naughang Mga Ngabil,

Nga Daw Nasunog Sa Mainintong Halok Sa Abril,

Naglagiting Karon Ang Kasingkasing Sa Mayo,

Nga Gihidlaw Sa Mga Bisibis Sa Ulan Sa Hunyo,

Apan Bisan Pa Sa Unsang Pagpakilooy Sa Yuta',

Gihikaw Sa Langit Ang Mga Lusok Sa Iyang Luha',

Naglagiting Ang Kauhaw Nga Way Ikatambal,

Kon Dili Ang Mitaliwan Mong Mga Pagmahal.

Busa Sud-onga Ang Mga Nagbaga' Baga Nga Balas,

Nga Maoy Nahabilin Sa Mga Batong Gibanlas,

Tan-awa Ang Mga Liki Sa Yutang Nangabuak,

Kay Walay Makapugong Sa Kinaiyahang Nahunlak,

Bisan Gani Ang Mga Hinuyohoy, Ang Dala Mainit,

Nga Ang Gihunghong Sa Mga Dahon Pulos Kasakit,

Kanus-a Pa Kaha Mobunok Ang Ulan Nga Gipanaad,

Kanus-a Pa Igasa ang Mga Yamog Kanus-a Ihalad?

Daw Dili Na Maagwanta Ang Alintabo Sa Udtong Tutok,

Nga Morag Aligato Sa Kayo Nga Sa Adlaw Nakigbatok,

Nauga Na Gani Ang Tutunlan Sa Naailong Kalibotan,

Kang Kansang Dila Mora'g Sa Mga Sulo Gisilaban,

Naglagiting Ang Kauhaw Sa Biniyaang Mayo,

Nga Dugay Nang Gihidlaw Sa Mga Yamog Sa Hunyo,

Human Pasipad-i Niadtong Abril Nga Lampingasan,

Ania Gihadla Sa Kahidlaw , Sa Hunyo Nga Way Balatian.

(Bug-os ang pasalamat sa  KAHAYAG  ngadto sa nagsulat sa  artikulo   nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).