Kaban ni Inting Botikol (JSL): NAGMINYO ANG ASAWA NI ANTOY

"Manakay ko'g barko Panyang isip marinero kay uyon na man si Mr. Ting sa hangyo nako kaniya kagahapon." sulti pa ni Antoy ngadto sa iyang asawa nga nagpatutoy sa ilang anak nga bag-o pa lang natawo. 

"Unya, biyaan na lang nimo ang pag-uma." sukna ni Panyang. 

"Ipaatiman na ni Tatay Karyo kay desidido na gyud kong manakay ug barko." tubag ni Antoy. 

"Asa man ang rota anang barkohang de kargamento?" pakisayod ni Panyang. 

"Ang rota niya mao ang Cebu-Bacolod ug Vice-Versa ug sa sunod semana ang among larga. Maayo nang barko kay libre sa kaon lakip sa pamasahe kada adlaw." patin-aw ni Antoy. 

Tuod man nakalarga isip marinero si Antoy. Naunsa mang pagkabutanga nga sa pagka tungang gabii sa paglarga sa barko nga gisakyan ni Antoy nagkadasmagay man kini sa usa ka "oil tanker" sa lawod. 

Nasunog ang barkong gisakyan ni Antoy ug usa siya sa naluwas sa trahedya. 

Naluwas siya sa usa ka mananagat nga nahilabay adtong higayona ug gidala siya sa payag niya. Sabas ang ngalan sa mananagat nga nakaluwas ni Antoy. Taudtaud nang biyudo ug adunay anak nga babaye nga dalagita na. 

"Kinsa ang imong ngalan?" nangutana si Sabas sa pagkabuntag niana. 

Apan igo lang si Antoy nga nagpirat-pirat ang mga mata ingon sa blangko gyud kini. 

Dili na makahinumdom sa iyang ngalan. Na "amnesia" siya. 

"Monapulo na man ka tuig sukad sa pagkahitabo ni Antoy, wa man koy balita kaniya hangtud karon." misantop a hunahuna ni Panyang kining mga pulonga. 

"Dako na ra ba si Dodong, ug walay amahan nga matawag ang bata. Maayo pang dawaton ko ang tanyag ni Paeng nga magpakasal ming duha." mibathay ang pahiyom sa mga ngabil ni Panyang samtang nagdigamo siya sa ilang panihapon.

Nakasal sila si Panyang ug Paeng ug giisip na lang usab sa naulahi nga iyang anak ang bata nila ni Panyang ug Antoy.

Sa pagka onse na ka tuig sukad sa pagkawala ni Antoy, naulian siya sa iyang maayong panimuot kay nawala na ang "amnesia" nga mitakboy sa iyang pangisipan. 

Makahinumdom na si Antoy sa mga panghitabo ug nakahibalo na siya sa iyang pangalan ug sa iyang asawa ug sa ilang anak lalaki. 

Mao tong miuli si Antoy sa ilahang kaugalingon. Maoy misugat sa iyang panan-aw ang iyang asawa ug ang iyang anak nga malipayong nangaon sa lamesa uban sa usa ka lalaki nga si Paeng. 

Nakatulo ang mga luha ni Antoy uban sa pagsabot na lang sa kahimtang sa iyang asawa uban sa lalaki nga bag-ong bana niini!!!.

(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos).