Kaban ni Inting Botikol (JSL): BANGIS NA KAAYO ANG TAWO KARONG PANAHONA

Ang  tawo sa kanhiay nga panahon, mahadlokon kaayo sa Diyos ug respetado sa ilang isig kaingon.

Tagsa ra ang manghilabot ug tawo kaniadto  sa dekada 50, 60, ug sa 70 ba hinuon.

Gawasnon ang atong mga katawhan  sa paglakaw ug pagsuroy panahon sa kagabhion nga walay  dautang mahitabo.

Gani ang mga silingan  kaniadto maghinatagay man ug sud-an ug pagkaon  agig tima-an sa diwa sa paghinigala-ay ug pagsinandurotay.

Apan karon wala na, segun sa mga panghitabo kada adlaw sa atong palibot.

Maghilak ang adlaw kon walay panghitabong pagkutlo sa kinabuhi  ug uban pang bangis nga panghitabo.

Sama sa nahitabo sa Estaca, Compostela, gidul-itan lang sa pagpusil ang ulitawo intawon nga nalingaw sa pagsayaw.

Sa Carcar lang, anak sa Mayor nga si Carl Vinson Apura gikalitan lang ug pusil sa agtang nga walay igong hinungdan.

Sa mao gihapong dapit didto sa Sitio Luan-luan, duha ka mga tawo ang nangamatay samtang usa ang angol atol sa nahitabong pagpangrakrak sa mga kriminal sa ilang “armas de fuego”.

Daghan na ang nagpanghadlok sa paglakaw panahon sa kagabhion gumikan sa mga kriminal nga de motorsiklo nga mamusil ug mosibat dayon pinaagi sa pagpabulhot sa ilang sakyanan human sa krimen.

Tulis, pusil, lugos ug shabu mao ang mga krimen  nga naghari sa atong palibot karong panahona ilabi na sa kagabhion.

Asa na man karon ang pagtuo sa mga kriminal sa Diyos? Naunsa na man ang “peace and order condition” nato karon?

Aron sa pagsulbad ning matanga  sa krminalidad, kinahanglan ang atong mga kapolisan mopahugot sa ilang “police patrol ug visibility” aron pagsanta sa mga kriminal sa ilang dautang binuhatan matag karon ug unya.

Kon adunay “police visibility” ang usa ka dapit ilabi na sa panahon sa kagabhion, magpanagana  gayud ang mga kriminal ug uban pang dautang mga elemento sa katilingban sa paghimo ug mga salawayong buhat sa atong palibot. 

(Bug-os ang pasalamat sa  KAHAYAG  ngadto sa nagsulat sa  artikulo  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos, Napatik kining maong artikulo sa  Banat News kaniadtong Hulyo 5, 2012)..