Kaban ni Inting Botikol (JSL): HARING GANGIS SI PANYONG
"Dili ba giingnan man tika nga kada adlaw ang kalas sa hantakan iintriga mo sa ako? pinabundak ang tingog ni Panyong nga pula na ang nawong gumikan sa inom sa tindahan ni Binong sulod sa merkado sa lungsod.
"O, dia ra, giandam na nako ning daan, ikaw lang kay apurado kaayo." sulti pa ni Toring dayong tunol sa kwartang kalas sa hantakan ngadto kang Panyong.
Gibuhian ni Panyong ang kuwelyo sa polo ni Toring ug mapahiyomong namulong, "Naa ra man lagi na, ayaw'g dugay-dugaya sa paghatag aron dili mo katilaw nako. " sulti pahimangno ni Panyong.
Nagsulod-gawas si Panyong sa Muntinglupa gumikan sa nagkadaiyang kaso nga nahimo gikan sa tigbas, dunggab ug pusil sa iyang kalalis kon ika-engkwentro labi na'g mahubog o makainom ba hinuon.
Katapusan niyang kaso mao ang pagpusil-patay niya kang Poldo kay gitablahan siya sa iyang bahin nga salapi agi sa tulis sa usa ka intsik sa bukirang bahin sa lungsod.
Dili kaayo taas ang iyang sentensiya kay nagbinuotan man siya didto sa prisohan.
Gikaintapan ug gikalisangan si Panyong sa ilang dapit mao nga gianggaan siya nga "Haring Gangis" kay ang mga bugoy ug mga maldito moislag bisan lang sa pagtan-aw sa iyang anino.
Gumikan sa pagkamaldito niya, namatay ang iyang asawa nga si Benigna sa konsumisyon ug kaguol.
Walay anak sila si Panyong, malagmit pagbuot sa kahitas-an.
Libre si Panyong sa inom sa balay-kahilayan sa ilang dapit gumikan sa iyang pagka-isog ug pagkapriso sa Muntinglupa.
Wala'y adlaw nga dili mahuslok ug maghapihapi si Panyong tungod kay ang iyang gusto mao gyoy matuman.
Pila'y estorya, wala lang damha nagkaang-kaang na si Panyong sa paglakaw kay 'nasira' siya sa babaye nga iyang nagamit sa 'casa' ni Madame Candida nga ilado ug nabaniog sa ilang lungsod.
Nag ubo-ubo na usab siya gumikan sa inom ug menos ang kaon. Mihugo si Panyong. Makita na ang bukog sa iyang abaga.
Wala na ang pagka 'Adonis' sa iyang lawas kaniadto ug ang iyang pagka undanon sa iyang mga bukton bisa'g edad-edaran na.
Tulin nga miligid ang panahon. Nakabsan sa kinabuhi si Panyong.
Wala na ang giilang 'Haring Gangis' sa ilang dapit. Busa, there's always an end to everything in this world.
Maayo gyong ampingan nato ang atong panglawas miyentras buhi pa ta dinhi sa kalibutan kay usa ra ka buok ang atong kinabuhi ug wala na'y lain pa! (KATAPOSAN).
(Bug-os ang pasalamat sa KAHAYAG ngadto sa nagsulat sa sugilagming nga si JENNER S. LOBEDICA. Nagtakuban siya sa pangalan, "Inting Botikol". Usa siya ka magsusulat sa mga lokal nga peryodiko sa dakbayan sa Sugbo isip magtatampo ug mga binisayang artikulo ug uban pang mga tagik sama sa sugilagming. Nagsugod siya sa iyang panulat sa tuig 1982. Gradwado siya sa kursong abogasya sa University of San Jose Recoletos. Nigawas sa Banat News kining maong sugilagming kaniadtong Hunyo 25, 2012,)..
Comments