Kaban ni Inting Botikol (JSL): SENIOR CITIZEN NA SI AGATA

"Senior citizen na gyud diay ko apan batan-on pa man ang akong hunahuna kay makahinumdom pa man ko hangtud ron kadtong mga panahon sa akong pagka batan-on." nakatuaw si Agata usa ka buntag niana samtang nag-atubang sya sa samin, nanudlay.

Mipadayon siya. "Maayo kong mosayaw sa hayskol pa ko niadto sa "You're Sixteen ug sa "Young Girl" nga mga tugtog sa baylehan nga sikat niadto. Daghan ang mag-ilog nako aron makigbayle."

Saysenta anyos kapin na si Agata ug makita na ang mga kunot-kunot sa iyang nawong ug agtang. 

Napulo na ka tuig siyang nabiyuda. Dagko na ang iyang mga apo sa tulo kabuok anak babaye niya sa kang Poldo nga mitaliwan na sa laing kalibutan gumikan sa inom ug sa pagkahinabako niini. 

Malipayon kaayo si Agata ning adlawa kay mokubra na siya sa tres mil ka pesos nga malabo isip "financial assistance" sa City Hall. 

"Uy Agata, kumusta." dihay mikablit niya samtang nagpaabot siya sa iyang turno sa pagdawat sa kuwarta. 

Sa pagyahat niya maoy misugat sa iyang mga mata ang  pamayhon ni Duro nga nagngisi sa kahimuot. 

"Buhi ka pa diay, Duro? Wala kapugong si Agata,  iyang naliaban si Duro. 

"Abi nakog patay ka na sa pagpangligid sa panahon!!!" pinabundak ang tingog ni Agata  dayong  buhi niya sa pagliab ni Duro ug mipaturatoy sa lamesa sa "paymaster" aron pagkubra sa iyang salapi. 

Kini ugod si Duro unang  uyab ni Agata kaniadto, apan unsa mang pagka unsaa nga gipulihan man siya sa kang  Digna kay gipakaslan man gyud niya. 

Mao tong pagkatapos niya ug kobra, nagdali siyang milakaw kay gilikayan niya si Duro apan giagpas siya niini. 

Samtang sige silang lakaw namahayag si Duro. "Agata, hikalimtan nato ang kagahapon ug maoy atubangon nato ang ugma. Biyudo na ko. Lima na ka tuig nga namatay si Digna. Wala nay makababag kanatong duha. Atong buhion ang atong gugma "

"Pag solo dihag imo Duro pulos na ta mga walay ata ug wala nay ikabuga pa. Kon sa adlaw pa kita, talisalop na! Hunong na anang imong mga binuang ug gwatsi." pintok nga mga pulong ang gibuhian ni Agata. 

Mipara si Agata ug taksi ug dayong sakay niini biniyaan si Duro nga masulub-on ug igo lang siya sa pagpanghupaw nga nagkanayon sa hilom, "Nagdumot pa gyud diay si Agata kanako!!!" (kataposan).

(Bug-os ang pasalamat sa  KAHAYAG  ngadto sa nagsulat sa  sugilagming  nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo  isip magtatampo ug mga binisayang artikulo ug  uban pang mga tagik sama sa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos, Napatik sa Banat News kining maong sugilanon kaniadtong Hulyo 16, 2012)..