Kaban ni Teofy del Mar: P A N A W

  

Sa akong dughan, daw may mga salampating nanglupad.;

Nag-ugom kinig mga awit sa kahinam

Nga makatunob sa mga baybayon

Nga pangandoy ko pa lamay nakataak.

Unya, sa takulahaw hiamgohan ko na lamang

Nga gidawatdawat na ang akong palad

Sa daghang maabi-abihong kamot.

Ang akong pahiyom – gibaslan og mga balak,

Gibaslan og mga awit. Ug ang akong mga tunob

Himatngonan kong nanalingsing og lapyong mga kaagi.

Ania ako karon, nagpuyo sa daghang kagahapon.

Samtang ang ugma, maoy ako pang mga panaw.

Sukdon ko ang gilapdon sa kinabuhi

Sa gidaghanon sa akong mga lakang.

Sukdon ko sa akong gininhawa

Ang pagpanglupad sa mga adlaw ug katuigan.

Didto unya sa nataran sa handurawan, iluyong ko

Ang mga handomanan sa mga panaw ko sa katuigan..

Mga handomanan nga gituga kanako sa panahon.

Mga handomanan nga nakaangkon na

Og luna sa kamingaw ning kasingkasing..

Sa gitakdang yugto, sa kataposan unya natong panaw –

Mag-abot kita sa kinasidsiran sa kahaponon,

Diin ang tanang adlaw pulos na lamang damgo;

Ug ang kahayag wala nay pagkapalong...!

(Bug-os ang pasalamat sa  KAHAYAG  ngadto sa nagpaambit ning maong   balak   nga si  TEOFY DEL MAR. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI" (Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug tinguha mao ang pagpalambo sa pinulongang Binisayang Sinugboanon ingon man sa arte ug kulturang Bisaya.). Daghang bangga sa panulat ug balak ang malamposon niyang nalambigitan. Nakadawat ug pasidungog kining maong garay kaniadto, isip Ikatulong Ganti sa bangga sa balak nga gipasiugdahan sa BATHALAD-MINDANAO, INC., gihimo sa hawanan sa Sanggunian Panglungsod Session Hall, Cagayan de Oro City, kaniadtong Nobyembre 20, 2010. Napatik usab  kining garay, "PANAW" sa BISAYA, magasin nga binisaya nga gipubliikar sa Manila Bulletin Publishing Corp., Manila,  kaniadtong Oktobre 6, 2010.)