NABISTO SI BERTING PALIKERO

"Bulak ang imong kahumot, nagtukmod kanako nganha kanimo. Bisan pa ug dili ko makahibalo sa imong pangalan, pahibaloa lang ko sa imong pahumot ug sa imong gipahumotan." ni Berting nga nanukad.

Si   Berting Palikero nakakita ug matahom nga binuhat nga nangalimyon sa kahumot. Iyang gituparan, gipabati sa iyang mga pulong gamhanan. “Bulak, pwede bang makahibalo ko?” ni Berting nga nitupad ug lingkod sa babaye.

“Unsaaa!!!” naisa ang tingog sa babaye. “Kapresko gud nimo.  Dili Bulak ang  akong pangalan. Wala man ko makaila nimo. Palihug lang ayaw ko ug samoka. Naa koy gihulat.”  pulong sa babaye nga pinaiknat ang kilay.

“Sultian tika Bulak ang imong kahumot,  nagtukmod kanako nganha kanimo. Bisan pa ug dili ko makahibalo sa imong pangalan, pahibaloa  lang ko sa imong pahumot ug sa imong gipahumotan.” Ni Berting nga nanukad.  Naghinamhinam na nga nagpaabot sa matag pulong nga buhian sa babaye.

"Pagkadakoa ra ba sa patik nga kalabera sa lalaki sa may braso".

“Bay, kasikit gud nimong nakalingkod diha tupad sa akong asawa. Unsa? Nagpasingit ka sa imong kaibog?” pulong sa lalaki nga naputos sa patik ang mga bukton.  Maskulado, bungoton ug siga kaayo ug mata nga walay pupamilok nga nagtan-aw ni Berting.

“Ah Bosing,   nakatupad ko sa imong asawa kay nadapit man gud akong pagtagad sa iyang pagkamaayong modala sa iyang pahumot. Naninda man gud ko ug pahumot, ako lang gisuwayan basin ug makauyon siya. Ikaw pud diay Bosing,  basin duna kay plano. Mahatagan tika ug maayong presyo.” pulong ni Berting nga nagpanglad-ok sa iyang laway. Gikulbaan si Berting bisan pa sa iyang nalitok nga palusot. Pagkadakoa ra ba sa patik nga kalabera  sa lalaki sa may  braso.

“Dali na Trina, mouli na ta. Nalangan man gud ko sa pagpyansa dugay naabot ang nagdala sa kwarta. Dako man gud ang pyansa sa akong  kaso.  Resulta  ni sa problema nga nakapasakit ko  sa akong pagkaseloso diha nimo.”  dayong kawhat sa kamot sa iyang asawa aron makabarog.

“Salamat Bosyo nga nakagawas na ka gikan sa halwa.” pulong sa babaye nga mahinangpon kaayo sa lalaki.

“Swerte ka Bay nga bag-o pa kong nakapyansa.”

Taudtaud nga wala makatingog si Berting. Naghinuktok. Naglumba ug dagayday  ang dagko niyang singot gikan sa agtang padulong sa iyang nangluspad nga panagway.   (KATAPUSAN).