Kaban ni Inting Botikol (JSL): NAKATAMPO BA ANG BAGYO SA PAGKAPORDOY SA PILIPINAS?

Bag-ohay pa lang, ang bagyong "Gener" midanyos ug minilyon ka pesos sa mga kabtangan, ug mga tanom nato dinhi sa nasud, ilabi na didto sa Bicol ug Luzon. 

Gawas niini, saysenta  kapin kon kulang ang mga kinabuhing nakalas.

Gisundan dayon si "Gener" sa dakong habagat nga miigo didto sa Luzon.

Pagkahuman sa habagat, miabot na usab ang bagyong "Helen" didto sa Aurora,  Quezon sa Southern Luzon.

Ning nahisgutang mga katalagman, dako'g perdisyon ug kadaot ang nahimo niini ngadto sa atong mga katawhan.

Busa, dili lang pangurakot ug pangawkaw sa bahandi sa lungsod ang atong pasanginlan mga maoy nakapordoy sa atong nasud, lakip na usab sa mga katalagman sama sa bagyo, baha, sunog, linog ug uban pa. 

Kinahanglan mag-ampo kita ngadto sa Kahitas-an nga unta ilikay kita Niya sa tanang matang sa mga katalagman aron magma-uswagon ug mag malamboon ang atong nasud kanunay ug sa higayon. 

Dako'g perdisyon ug kadaut ang nahimo sa mga katalagman ngadto sa atong mga imprastraktura, mga pagkaon ug labi na sa kapid-ang mga kinabuhi sa atong mga kaigsoonan!!

(Bug-os ang pasalamat sa  KAHAYAG  ngadto sa nagsulat sa  artikulo nga si  JENNER S. LOBEDICA. Nagtakuban siya sa pangalan, "Inting Botikol".  Usa siya ka magsusulat sa mga lokal nga peryodiko sa dakbayan sa Sugbo sama sa Banat News isip magtatampo ug mga binisayang artikulo ug  uban pang mga tagik sama saa sugilagming.  Nagsugod siya sa iyang panulat sa tuig 1982. Gradwado siya sa kursong abogasya sa University  of San Jose Recoletos)