Kaban ni Atty. Josephus B. Jimenez: PISTA NA USAB.....MODUAW AKO KANIMO.....RONDA

Nasimhotan ko na ang mga bulak sa azucena,

Nasil-ingan ko ang mga halad sa altar gipahiluna,

Humot kaayo ang mga nangalaisbong linuto sa kusina,

Pista na gayod sa atong lungsod, Pista Na, Ania Na.

Lagbason ko ang mga panganod, makaduaw lamang kanimo,

Lat-ason ko ang lawod, aron makita pag-usab ang katahom mo,

Ang Katahom sa Imong hulagway Nakit-an Ko Sa Akong Kahiamgo,

Gimingaw Ako Kanimong Nakita Lamang Sa Handurawan Ko Ug Damgo.

Dugay Nang Panahon Nga Ikaw Akong Namingawan,

Ang Bungtod Mo Sa Liboo, Hagba Pang Akong Nalantawan,

Ang Imong Langin, Malalay Ug Kan-abuhon, Daghang Handumanan,

Nga Kapid-ang Katuigan Ko Nang Gihandom Ka Dugay Nang Gitalikdan.

Bisag Daghang Samad sa KasingKasing Ang Gibilin Sa Panahon,

Tungod Sa Mga Pagsulay, Kasakit Nga Nahiagoman Ug Ania Gihapon,

Bisan Pa Sa Tanan, Ikaw, Ronda, Nagpabiling Pinangga Ning Imong Ulipon,

Duawon Ko Ikaw, Duawon Gayod, Way Pakyas, Matag Karon, Hangtod Sa Kamatayon.

(Bug-os ang pasalamat sa  KAHAYAG  ngadto sa nagsulat sa  balak  nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK.).