Kaban ni Atty. J. B. Jimenez: ALANG KANG SAN PEDRO...MARTIR UG SANTO NGA TAGA GINATILAN

Kinsay magdahum nga ang usa ka kabus nga batan-on,

Nagtiniil nga bata bata sa usa ka Heswitang dili tabunon,

Kinsay magdahom ang labing tinamay nga Sugboanon,

Mamahimong Santos Sa Simbahang Katoliko Ug Kristohanon.

Milangyaw sa edad nga napulo ug upat,

Milat-as sa mga lawod ug halayo nga dagat,

Mibiya sa yuta sa ginikanan niya ug kaliwat,

Namatay nga wala gani makapadala ni sualt.

Usa ka katekista, luyo luyo sa pari ug sakristan,

Bisag asa padulong ang pari, kanunay nga uban,

Mao Nga Sa Dihang ang amo Buot Nga Pasipad-an,

Giali Ang Lawa, Nagpapatay Aron Ang Amo Panalipdan.

Gihalad Ang Kinabuhi Nga Walay Bayad ug Bugti,

Gihalad sa Dios Ug Sa Balaanon Niyang Mithi,

Walay Hinagiban Nga Maka Ali Ni Makalugti,

Sa Kamatayon Niya Hinoon, Ang Langit Nasinati.

Pedro Calungsod, Nga Garbo Sa Ginatilan,

Garbo Usab Sa Mga Kabus Nga Kalungsuran,

Sa Habagatang Sugbo Nga Sinalikway Ug Kinalimtan,

Garbo Ikaw Pedro sa Imong Mga Kristohanong Katilingban.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)