Kaban ni Atty. J. B. Jimenez: KON MAHIMO AKONG DUMUDUONG SA KAUGALINGON KONG NASOD. . . .

Kon ang mga baroganan ko nahisumpaki,
Sa mga sumbanang bag- o nga nagdumili sa pagtuki,
Kon ang mga paglantaw ko niining kinabuhi,
Nahasupak sa mga naghari hari nga may pagtuong lahi,
Unsa may akong buhaton, pugson ko ba ba pag bakwi,
Ug iubay na lamang king baroganan sa katarongaang hiwi ?
Kon ang misakmit sa akong nasod balikog ang mithi,
Ang prinsipyo ko bang tanos, himoon kong suhi? 

Tugoti, baya nga ako hugot nga magdumili,
Nga maga paanod na lamang sa bus-og sa dahili,
Pugson ko ang umoy nga mosukol, makiglantugi,
Sa katapusang hunat, bisa'g lisod andam akong makigtigi,
Ang pag-alsa batok sa mga manaogdaog, wala akoy pagmakuli,
Bisag king timawang kinabuhi, kang Bathala ako nang iuli,
Ang dungog nga inampingan walang sarang ikabugti,
Bisag ang katapusang gininhawa malugti.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)