Kaban ni Atty. J. B. Jimenez: ANG MGA MAKALOLOOY, WALAY PASKO. . . . .

Morag Gikuso Kuso Sa Mabangis Nga Kinaiyahan,

Ginatos Nga Kinabuhi Gibugto' Way Dahan Dahan,

Mga Anak Gibawian sa Ilang Amahan Ug Inahan,

Nailo Na Nga Tuwapos Sa Ilang Ginikanan,

Giguba Pa Sa Bagyo Ang Ilang Pinuy-anan,

Unsaon Man Pag Saulog Sa Pasko, Unsaon Man,

Kon Pulos Minatay Ang Nanag Bad-ay Sa Atubangan ?

Kon Ang Langit Dulom Ug Nagkalapok Ang Kalibotan ?

Nanag Puyo' Sa Ebakweson, Kulang Sa Pag Kaon,

Nag Inilogay Sa Relief Goods, Luya Na Ang Mga Lig-on,

Makalolooy Kaayo Ang Mga Kabus Natong Igsuon,

Naga Laum Na Lang Sa Mga Maloloy-on,

Kay Ang Kinabuhi Walay Nahut Intawon,

Hinaut Pa Unta Nga Kaloy-an sa Mga Plipinhon,

Nga Nahinuklog Sa Ilang Mga Pag-antus Karon,

Hinaut Pang Mo-abot Ang Tukma' Ug Igong Kinahanglanon.

Kay Wala Nay Pasko Nga Sarang Pang Mapa Abot,

Ang Mga Sinalikway Nga Timawa Ug Alaot,

Wala Nay Bituon Nga Mosubang, Walay Panghinaut,

Ang Mga Kabus Nang Daan, Gidaogdaog Pa'g Samut,

Wala Nay Pasko Nga Sarang Pang Mopasig Nunot,

Sa Mga Tawong Gikuraw, Walay Bisag Nahut,

Wala Nay Pasko Pa Ang Mga Hapit Nang Maghanot,

Luha Na Lang Ang Gipanag-inom Uban sa Dugo' Ug Singot.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)