Kaban ni Atty. J. B. Jimenez: P. A.. G .K. A P.. U .K. A.. N . . . . .P . A. G . K . A . P A. R . O . T . . .

DILI NATO MA PAKYAW ANG TANANG KADAUGAN,

ANG TANANG PAG DAUG ADUNAY KINUTUBAN,

SA SANGKA' SA NATAD NING MABALHINONG KALIBOTAN,

ANG MODAUG KADAGHAN, MAY NAGHULAT NGA KAPAROTAN,

BUSA ANGAY NGA MOSABOT SA DAGAN SA KAPALARAN,

ANG PAG DAUG DILI SA PANAHON NGA TANAN.

II

APAN SA MATA SA MGA TAWONG MASINABUTON,

ANG PAG DAUG DILI SOLO NIADTONG MAOY NAKA-ANGKON,

SA KORONA UG BAKOS SA PAGPATIGBABAW PAGKA KARON,

ANG NAPUKAN MAHIMO USAB NATO NGA PAGA TAWGON,

SA IYANG GIPAKITANG PANLIMBASOG, SYA USAB MADAUGON,

KAY SA NAGPUNGASI NGA SUMBAG NAGPABILIN SIYANG MASOGON.

III

MAPILDE MAN SA MAONG BUGNO' APAN PIHO NGA MAANGKON,

ANG KAPIN SA USA KA BILYON UG TULO KA GATOS KA MILYON,

UBAN SA PAG PALUYO SA MGA LUNOD PATAY NGA PILIPINHON,

UG ANG MGA PAG-AMPO SA TANANG MGA IGSUONG TABUNON,

DAGHAN SA MAN USAB NGA GIPUKAN SI MANNY NGA MEXIKANHON

MAO NA KINI ANG SUMBALIK DASDAS SA MABALHINONG PANAHON. 

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)