Kaban ni Atty. J. B. Jimenez: P....A....B...L...O...., ANAK KA NI SENDONG, UG RUPING, APO NI ONDOY. .

Kaluy-an Unta Ni Bathala', Kining Kabus Nga Nasod,

I-ampo Unta Kita Sa Dios Ni San Pedro Calungsod,

Kay Ang Mga Timawa' Nagyaka yaka' Ug Nagluhod,

Sa Tumang Ka Alaut Ug Sa Hilabihan Nga Kalisod....

Ayaw Intawon Subli-a Ang Ruping Kay Mapait,

Ang Umaabot Nga Pasko Nga Sa Halayo Mobakwit,

Ipahilayo Kining Imong Lungsod Sa Tumang Kasakit,

Luwasa Intawon Kami Nga Sa Kawad-on Nag Ping-it.

Ayaw Intawon Ang Sendong Ipa subli, O Ipa- Usab,

Bisag Pag Hisgot Sa Kabangis Nya, Igo Nang Maka Ukyab,

Ang Tanang Mga Malig-on Mangatuis Ug Manga Ukab,

Mga Balay Manga-anod, Mga Kinabuhi Mora Ug Gipanag Galab.

Ayaw Ug Ibalik Ang Kabangis Ni Ondoy Intawon,

Nga Maoy Maga Banlas Sa Mga Pangandoy Hinoon,

Ipahilayo, Amahan Ko, Kining Mga Anak Mong Pilipinhon,

Nga Naga Yukbo' Ug Nangaliyupo Kanimo Sa Tanang Panahon.

Panalipdi Kami, Dios Ko,Sa Gamhanan Mong Pag-amping,

Aron Ang Mga Kinabuhing Timawa' Dili Mabugto' Ni Malumping,

Kaloy-a Intawon ang Among Kabus Nga Kasing Kasing,

Nga Kon Tanom Pa, Gugma Ug Pag Amoma Maoy Mga Salingsing.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)