Kaban ni Teofy del Mar: PASKO: DUHA KA KAHIMATNGON
 |
| Ang tulo ka Mago |
i.
Kling-klang: king-klang... Kling-klang; kling-klang..!
Nagpanawag ang lingganay sa simbahan.
Unya, gikan sa dug-ol ug lagyong unahan,
Nagpanon, nag-ambahan ang daghang mga tunob -
Sungasong sa tun-og ug tugnaw nga kagabhion.
Ug sa panumdoman sa tawo
Nabuksan pag-usab ang langit,
Sa panganod nanglutaw ang mga manulunda;
Ug niadtong kamig nga gabii sa Disyembre,
Gisibya sa awit sa mga Angel:
Ang pagkahimugso sa Mesiya dinhi sa sabakan sa yuta;
Ang pagkatawo sa manluluwas sa kalibotan;
Ang pagkatawo sa lunsay nga timaan
Sa gugma sa Amahan sa katawhan.
Kinsay nakasaksi niining halamdomong hitabo?
Ah... tingali wala lamay nagpakabana.
Gawas sa tulo ka Mago nga nagbugtaw
Niadtong nabulos nga kahayag
Nga daw giguyod sa usa ka masigang bituon;
Gawas sa pipila ka nagduka pa
Nga mga magbalantay sa karnero
Niadtong laguna nga duas sa kinaiyahan.
Ang talan-awon tugob sa Balaanong Kamingaw.
ii.
 |
| poinsettia |
Ug misibaw sa kalikopan ang mga awit ug daygon.
Mga bata, hingkod ug tigulang nag-ambahan.
Maayong Pasko, Ninang! Maayong Pasko, Ninong!
Maayong Pasko, Tagbalay! Maoy mabati sa kahanginan.
Samtang sa mga panimalay, ug sa ubang mga dapit sa
palibot
Naghasi ang tagay; ang singki sa mga kopa;
Ang singki sa mga baso nga puno sa nagtikba nga alak.
Nakigsagol kini sa kasaba sa lanog nga mga talidhay.
Ang kaalingasa daw sa naghuot sa kalikopan.
Gani, ang huyohoy sa matugnaw nga Disyembre
Naglisod man paglighot, aron pagpangita og kahilom.
Pila na lang kaha ka kasingkasing karon
Ang nagbalaan sa mga hamdomanan sa Pasko?
Nga nagatungab sa kalis - pasalamat
Sa gasa nga gihatag sa Amahan?
May mga kalag pa ba kaha nga mohago pagbugtaw
Kon may kahayag man nga mobadlis sa langit?
Tungas-dulhog sa mga bukid ug kalugotan?
Sungasong sa tun-og ug sa katugnaw sa kagabhion?
 |
| kling-klang, kling-klang, nagpanawag ang lingganay sa simbahan |
Nagpanawag ang lingganay sa simbahan.
Ayaw baya pabuyo sa lumalabay nga hudyaka.
Ayaw pasagdi nga mahisalaang ang imong mga lakang.
Subaya ang dalan nga giagian sa mga Mago;
Nunti ang tunog sa awit sa mga manulonda -
Ug ang Pasko hikaplagan mo diha sa imong kasingkasing.
(Bug-os ang pasalamat sa KAHAYAG ngadto sa nagpaambit ning maong balak nga si TEOFY DEL MAR. Usa siya ka tadhan nga magbabalak nga nabantog dili lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga magsusulat ginamit ang pinulongang binisaya, "LUDABI" (Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug tinguha mao ang pagpalambo sa pinulongang Binisayang Sinugboanon ingon man sa arte ug kulturang Bisaya.). Daghang bangga sa panulat ug balak ang malamposon niyang nalambigitan.
Napatik kaniadto sa Bisaya Magasin kining maong garay. Nahimo usab siyang Kampeon kaniadtong Oktobre 2012, sa tigi sa sinulatay sa balak nga gipasiugdahan sa BATHALAD-MINDANAO, INC.. Gihimo kini sa hawanan sa Cagayan de Oro City diin ang mga maghuhukom gisalmotan sa mga iladong magsusulat sama kanila ni Atty. Junne Canizares, magsusulat ug Eninglis ug Binisaya ug kanhi Literary Editor sa Bisaya Magasin nga tua na magpuyo sa Manila isip usa ka retiradong nga maghuhukom. Lakip na usab sa mga maghuhukom mao ni Atty. Cesar Kilaton, Tigbitang sa Dagang Foundation Inc., (AKADEMYANG BISAYA) ug si Don Pagusara, nga atua na manimuyo sa Davao isip usa usab ka banggiitang magsusulat sa balak ug sugilanon nga Binisaya ug Eninglis.).
Comments