Kaban ni Atty. J. B. Jimenez: HANDUMANAN SA REBOLUSYON.....

I

PAGKA PISKAY SA PAGDAGAN,

SA PANAHON UG SA KASAYSAYAN,

PAGKA DALI SA PAG LIGID SA KATUIGAN,

UG SA PAG BALIT-AD SA KALIBOTAN,

II

GIPAPAHAWA' ANG MANLULUPIG,

APAN ANG NASOD NAGA SANGKIIG,

GILUNOPAN SA MGA BALOD SA MGA TUIG,

UG PAGKA DAGHAN SA MGA DAMGONG NANGATUSKIG.

III

NAGA SALIG SA MGA MAANINDOT NGA SAAD,

SA MGA BAG-ONG HARIANONG BUOT MO-ALAGAD,

APAN SA KAPULIHAY DIAY KAPAKYAS ANG HALAD,

SA MGA KABUS NGA GIPURGA SA KAASGAD.

IV

PAGKA DAGHAN NA UNTA SA HIGAYON,

NGA MAG-BAG-O ANG TIMAWANG NASYON,

APAN GIPUSGAY SA LIMBONG UG KORAPSYON,

SA MGA POLITIKONG GI UNA ANG KAUGALINGON.

V

LAIN LAIN UG PARTIDO APAN AMGID LANG ANG TINGUHA',

MGA TUMONG WAY LAIN KON DILI MAKAHAKOP, MAKA KUHA',

WAY LAING DULOT SA NASOD KON DI PAGMAHAY UG LUHA',

WALAY UGMAD BISAN SA MAKAMATAY NGA PANINGUHA'.

VI

NASAYANG LAMANG ANG MGA PANGANDOY SA EDSA,

NAHUNLAK, NALARAG, NAUSIK, NAPASA PASA,

USIK LAMANG ANG PANGANDOY SA MATAG USA,

NAGLUNANG SA KA-TIMAWA' ANG KABUS NGA MASA.

VII

UNYA KARON, SA ELEKSYON, USBON NA SAB NGA ILARON,

SAARAN PAG USAB SA MGA PANUMPANG NGA PAKYASON,

ANG KASING KASING SA KABUS USBON NGA PAGA LUBAON,

UG MA-ALAUT NA USAB ANG MAYOKMOK NGA PILIPINHON.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)