Kaban ni D_BystandeR: NAHUTDAN NA UG HISGOTANAN SI MIKE???

Gi-entrahan na ni Mike Rama ang tanan lakip na ang away nga personal sa duha ka babaye mahitungod sa usa ka buok isda nga igbubuwad nga tungod sa misilaob nga kapungot sa ilang panaglalis na-itsa sa usa ka babaye aron pagpahungaw sa iyang gibati. Nahitabo kini tali sa duha ka babaye, ang usaniini giila nga si Salvacion Bueno, 60, ug taga Sityo Alaska, sakop sa Barangay Mambaling, Syudad sa Sugbo nga mamaligyaay ug buwad ug si Liza Boltron nga gikataho nga usa ka BOPK supporter. Nagsugod ang maong panaglalis sa dihang si Bueno nakit-an ni Boltron nga wa motunol sa iyang kamot aron sa pakiglamano sa usa ka kandidato sa BOPK nga kauban sa pundok nga nangampanya. Si Bueno nangatarungan nga wa siya molamano kay ang iyang kamot bahong buwad ug dinhi magsugod ang panaglalis sa duha ka babaye nga misangpot sa paglabay sa usa ka gamayng isda nga igbubuwad pa. Ang maong hitabo gireport ni Bueno (dried fish vendor) ngadto sa kapolisan sa Mambaling Police Station. Ug dinhi ni-entra si Mike Rama nga kon magkinahanglan si Bueno ug tabang nga legal andam siyang mohatag sa iyang legal nga serbisyo kay matud niya kadtong gibuhat sa kalalis ni Bueno usa ka kalapasan sa iyang gitawag ug "human rights violation." 

Apan si City Councilor Margot Osmena, asawa ni Tommy O, namahayag nga ang gilalisan sa duha ka babaye personal ug way labut ang BOPK. This is a cheap kind of gimmick that if Mike Rama wants to make it big nobody will buy it!

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCANO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)