TUBOD SA NAUGHAN'G SAPA

TUBOD SA NAUGHANG SAPA

Lawom  ug daw makalumos sa kalibog,

Kon naughang sapa pangitaan ug tubod,

Apan  tugoti'ng tugawon   ko  ikaw,

Hawiran ko ang imong pagkalatagaw,

Samtang  nagbul-og   sa katin-aw,

Ang matentalon’ng tubig nag-agos,

Iyarok kini ug itambal sa kahigwaos,

Sud-onga ang timgas nga tubig sa sapa,

Hinayhinay ug inanay kini'ng mawala,

Maabtan kining tanan sa kausaban,

Mangabot ang kunot nga dili kapugngan,

Ang garboso'ng pagpabuhagay,

Lukpon, hakpon sa pagpanglaylay,

Pag-abot sa kahaponon,  magkanayon,

"Diyosa, bisan pa ug  sa tubod nahubsan

Ang  sapa nga nahimo natong kinuptanan

Kon sa kabaskog sa ugat ako gihikawan,

Sangka sa gugma ug kama  ako nakalimtan,

Nagpabilin ako'ng  nagtukaw ug namuwaw

Ang pinitik  sa taknaan  ako'ng gihanduraw

Daygan ko ikaw’ng lab-as kanunay ang tanan

Naghandum,  sa  kaanyag mong nahuptan.”