Kaban ni D_BystandeR: LAING BAKAK NI MIKE???

Kining pamahayag ni Ady Sitoy diin iyang gipanghimakak ang pangangkon ni Rama nga nagka-estoryahay sila ni  Sitoy mahitungod sa 3rd bridge proposal usa ka kamatuoran nga kining tawhana (Rama) bisag unsa na lay iyang buhaton aron ingnon nga duna siyay insaktong panghunahuna alang sa kaayohan sa Syudad sa Sugbo. 

Ang dakong palpak niya sa iyang unang kaminyoon nga gi-anular sa korte kaniadto pa sa tuig 2001 nagpaila nga duna siyay tilimad-on nga ang iyang pangutok dili kaayo kasaligan ug mao nay hinungdan nga ang kinabag-an sa mga mabuot nga pumipili atua magpaluyo sa kasaligan nga liderato ni Tommy Osmena nga puno sa kaligdong ug katarung nga modala sa renda sa pangagamhanan diin si Tommy way gipili sa iyang mahigalaong pag-alagad sa lungsod kabus ka man o adunahan. And Tommy gives preference to the saying, "To give justice more to those who have less in life."

(Bug-os ang  pasalamat sa KAHAYAG ngadto sa magtatampo  nga si JOHNNY LOVE. Nagtakuban siya sa pangalan, "D_BystandeR".  Natawo siya sa Sugbo apan anaa na karon manimuyo sa Illinois sa tinipong nasod sa Amerika. Ang kusog nga koneksyon sa kasayuran pinaagi sa internet kanunayng naghaling sa iyang kadasig  pagtuki sa mga nagbukalbukal nga hisgutanan dinhi sa atong nataran. Usa siya ka magsusulat nga gradwado sa kursong komersiyo padulong sa pagka accountant sa University of San Carlos kaniadtong tuig 1961.  Nahimo siyang miyembro sa usa ka hugpong sa mga batan-ong magsusulat nga gitawag ug STUDENT PRESS.  Nahimo usab siyang   Associate Editor sa basahon  USC-JPIAN sa tuig 1962-63. Magtatampo usab siya isip magsusulat sa nasudnong magasin,  "Philippines Free Press" ug sa mga nag-unang peryodiko dinhi sa dakbayan sa Sugbo sa lunhaw pa ang iyang pangedaron. Nahimo siyang mamumuo sa usa ka pribadong kompaniya sa dakbayan sa Sugbo, ESCANO LINES, sulod sa napulo ug duha (12) ka tuig  dayon niyang tapon  ngadto sa NAPOCOR  ug nahimong kawani sa kagamhanan  sulod sa bayente dos (22) ka tuig. Niadtong tunga-tungang bahin sa tuig 2000, nilalin siya ngadto sa tinipong nasod sa Amerika ug sulod sa napulo (10) ka tuig, nagtrabaho siya sa  buhatan sa kagamhanan sa nasod sama  sa  UNITED STATES POSTAL SERVICE (USPS).  Karon sa pangedaron nga 68,  gihuptan gihapon niya ang walay pagkutat nga kadasig ug walay busganan nga kaikag sa pagpaambit sa iyang nahuptang abilidad  ug kabatid sa panulat.  Dili niya mapugngan ang kaugalingon sa pagpaambit sa iyang mga hunahuna labi na kon molambigit kini ug hisgotanan nga makadani sa iyang mga mata.)