Kaban ni Richard: AYAW UNA AKO TALIKDI

  

AYAW UNA AKO TALIKDI

Hinumdomi inday,

kon imo akong talikdan,

hinginli una ang mga bitoon og bulan,

nga maoy saksi sa atong mga saad og panumpa,

taliwala sa mga batang sa kagabhion.

Mabugnaw'ng huyohoy,

 misanduloy sa mga lapyong kadahonan,

 nga nag-ugkat sa mga gambalay,

 ning tigbayon sa handurawan.

Pagkasayang inday,

sa mga panid sa kagahapon nga atong gisaluhan,

nga nahimong katsaw sa mga panganti,

sinaksihan sa mga lagingling sa mga timos sa kagabhion.

Talikdi ayaw, kining binuhat

nga nakapaukyab sa tabil, sa gugmang putli og tiunay,

nga bisan ang naughang sapa sa pangindahay,

 mohamog sa dinaligdig,

sa lusok sa luha nga gikan sa akong mga mata,

nga nagbasuni sa tumang kahapdos og kasakit.

(Bug-os ang pasalamat sa KAHAYAG ngadto sa nagsulat sa garay nga si  Richard “Ondo” Paghasian, nga nanimuyo sa Casuntingan, dakbayan sa Mandaue. Magsusulat siya ug magbabasa ug mga balak gani, nahimo na usab siyang kampeyon sa  lain-laing bangga sa balak nga iyang gisalmotan.)