SAGBAY-LUWAG ANG GIPANGITA NI NOY KIKOY

SAGBAY-LUWAG ANG GIPANGITA NI NOY KIKOY

Pagdibuho ang hilaw sa butang nga adunay kakulang. Dili pa angayan kutloon gikan sa punuan, aslom kon tilawan. Sa hilaw ikaw magtagamtam. Kon kini masubraan, hinog ug lata ang padulngan. May mga binuhat nga hilaw ang ilogan, magtabisay ang laway daw gitiawan.

Si Noy Kikoy naghiwaos, nakakita ug binuhat nga walay hilam-os.

'Noy, ngano’ng nagpasalipod man ta?” pulong pa ni Terry.

“Day, maayo nang ingon niini aron ka makatarong ug tilaw. “ ni Noy Kikoy pa nga wala mahimutang.

“Pero, Noy basin ug makit-an ta’s imong asawa. Selosa ra ba na siya.” mabalak-on’g tubag ni Terry.

“Ayaw kabalaka Day. Dali ra ni.” pasabot ni Noy Kikoy.

Human sa pipila ka gutlo.

“Hala, ganahan lagi ko.” nakabuhi ug tam-is nga pahiyom si Terry.

“Unya, puwede na?” sukna ni Noy Kikoy.

“He, he puwede na kaayo Noy.  Ikaw pa.”

“Hoy, nag-unsa mo?” wala nila maalinggati ang pag-abot ni Nang Magda. Nagtutok ug pinaiknat ang kilay nga nagsud-ong nilang duha ni Noy Kikoy ug Terry.

“Oy, Magda, ok na.” dali’ng tubag ni Noy Kikoy ngadto sa iyang kapikas.

“Unsay ok? Nag-unsa man diay ka? Nag-unsa man diay mong  duha dinhi nga nagpasalipod man mo?” sunod-sunod ang pangutana ni Nang Magda.  

“Sus, nalimot ko’g pahibalo nimo. Akong gipatilaw sa atong baligyaon’g mangga si Day Terry. Manggiulawon man gud ni siya. Hala, ok na.” pulong ni Noy Kikoy.

“Ah, Nang Magda, kining… Sakto kaau ang kahilawon sa mangga nga ibaligya ninyo sa akong tindahan. Mabdos man gud ko ako’y tigtilaw ron sa mga hilaw’ng mangga nga akong ibalig-ya. Hala delibiri pa ko ninyo aron makabaligya ko'g manggang hilaw. Hehe. Lami gyud. Si Noy Kikoy man gud, gipaigot pa gyud niya ang pagpatilaw.” dala komedya’ng tagad ni Day Terry ngadto ni Nang Magda.

“Salamat Day Terry ha. Unsaon dukirok man gud ni si Noy Kikoy nimo. Abi ko’g milighot ug palusot sa iyang kapilyo. Gusto pud ra ba ni siya ug hilaw nga prutas. Gusto siya ug sagbay-luwag.” namulong si Nang Magda nga naulian sa pangigi.

“Mao ba? Hala sige hatdi lang pud hinuon ko ninyo ug butong. Kanang sagbay-luwag. Mas tam-is kuno na siya ug sabaw.”

“Ngee..” wala na makapamulong pa si Nang Magda. Inosente pa gayud si Inday Terry. (KATAPUSAN).