Kaban ni Mario Vincenzo Menchavez: SAN REMIGIO

San Remigio

Makaikag ang agik-ik sa kabataan

Nga nagdula sa taas ug puti'ng baybayon

Samtang giumol sa kakugi sa mga ginikanan

Ang mahayag nila'ng kaugmaon.

Puy-anan sa mga kababayen-an'g

Madanihon ug maabiabihon,

Ug kalalakin-an'g ang kinaham kaunon

Bakasi, bat, sasing ug tuyom.

Kanhi Kanghagas kon tawagon

Kon ang mga katiguwangan ang pasultion,

Kay kuno daghan man sa dapit ang mao'ng

Matang sa kahoy sa una'ng panahon.

Agi'g pasidungog sa katakos ug kaisog

Sa Katsila'ng si Remigio Multon

Sa pagbuntog sa mga malupigon,

Ang Kanghagas, San Remigio na karon.

Pipila lang ang molopyo'ng bahandianon

Apan ang kinabag-an maalampoon,

Ug sama kataas sa puti'ng baybayon

Ang pangandoy nga ang lungsod palamboon.

San Remigio, amo'ng San Remigio,

Biyaan ka man, kanunay ka'ng balikon,

Tinubdan ka sa mga paningkamot ug damgo,

Sabakan ka namo'ng mga San Remigiohanon.

(Bug-os ang pasalamat sa Kahayag ngadto ni Mario Vincenzo Menchavez Mandal, usa sa mga binuhat nga naghupot ug bulawanong pluma sa panulat sa pinulongang binisaya.).