PANAPI NGA MAKALILISANG

PANAPI

buhat nga dili mangila

mokutkot sa bulsa's mabiktima

hangtod mahurot ug mabangkarota

kaban sa pangagamhanan,

mga binilyong salapi sa katawhan,

gipanapi, giwariwari, gipalusotan, pagkamakalilisang

dagkong baba sa mga NGO, gipaagi ang atong buhis,

apan bulsa's mga senador ug kongresista diay gipapingis,

binilyong natodas ug nawala, lakip na si JANET LIM-NAPOLES

pagkadimalasa, mga katawhan nagminghoy

bagyo sa pangurakot, si JUAN DE LA CRUZ ang makaluluoy

mga pasalig sa pagsuta sa tinuod ang giladlad, kanato gipalamoy

sa kadaghan ug kabug-at sa palas-onon,

katawhan sagad mabundakan sa mga mahal nga palaliton

mga purdoy ang gipaantos, baba sa mga halangdon, nagtak-om...

hugot nga baroganan atong huptan,

kon dili karon kanus-a man, kon dili kita kinsa man,

kaban sa katawhan,  himolbolan kon mangatulog kita sa pansitan….