Kaban ni Atty. J. B. Jimenez: B...A...N...G....O....N.... ......B....O....H....O....L.....

B...A...N...G....O....N.... ......B....O....H....O....L.....

Kon Diin ka mahisukamod, Bangon,

Kon Asa Ka Mahilukapa, Tindog,

Bisag Samaran, Ayaw Kahadlok, Padayon,

Taliwala Sa Kalisod, Sukol Ug Barog,

Dugo' Mo Gikan Sa Ugat Ni Sikatunang Bol-anon,

Kaliwat Ikaw Ni Dagohoy Nga Maisog,

Bisan Pa Sa Tanang Katalagmang Kusganon,

Ang Baroganan Mo Dili Gayod Matay-og,

Bangon, Bohol, Atubanga Ang Hagit Sa Panahon,

Ayaw Pag Panuko; Nga Matakos ang Imong Kusog,

Wakay Gahum Ning Kalibotan Nga Sarang Bungkagon,

Ang Imong Hugot Nga Tumong Sa Pag Das-og,

Padayon Ug Ayaw Palingla Sa Mga Mabiay-biayon,

Ikaw Kini Ang Bol-anon Nga May Prinsipyo Ug Dungog...

Bohol, Ayaw Pag Panuko, Bangon,

Bangon Gayod, Ug Panlimbasog. . . . 

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)