Kaban ni Teofy B. del Mar: ANG MGA LUOG

ANG MGA LUOG…

Ug napukan ang dagkong kahoy..!

Uban sa paghagsa sa mga punoan;

Misibaw ang talidhay sa mga Luog,

Kansang kasipa daw liti –

Nga migilis sa kadulom sa gabii.

Ug milugos sa putling kahilom sa palibot.

Ang sulog sa tingusbawan nakiglumba

Sa dagan sa mga takna ug katuigan.

Napuril na sa mga Luog ang lasang.

Nakubkob gani ang mga bahandi sa yuta-

Wa sila’y pagpakabana kon may napusgay

Bang mga damgo, tugbang sa ilang pagpahimulos

Sa katigayonang giampingan sa kinaiyahan.

Sa pipila ka higayon nga nakuptan sa mga Luog

Ang renda sa kagamhanan. Daw hari na sila

Nga nagtungkawo truno sa kahakog ug panlupig.

Mga bungol ang ilang mga dunggan

Sa daw  dangoyngoy nga huros sa hugaw nga hangin

Nga naglutaw sa kawanangan.

Alang kanila: nawad-an na’g kahulogan

Ang amang nga bakho sa naughang mga tubod…

Maoray ilang nabati ang tinagingting

Sa mga pilak ug bulawan nga naangkon.

Sa lanat nga pag-utong sa ting-init,

Mangliki na ang giuhaw nga yuta.

Sa banos nga pagbunok sa mapintas nga ulan –

Modahili na usab ang mga bungtod.

Moawas na ang gagmay ug dagkong kasapaan.

Ug ang naghuramintadong bul-og sa tubig

Mosanap na sa tanang dapit sa kapatagan.

Ug mabati sa kahanginan ang nagkalahugay

Nga singgit ug hilak sa kalisang sa mga alaot

Nga biktima sa pagpabaya sa kalikopan.

Oh, katilingbang Luog, nasayod ba kamo

Nga bisan sa tul-id ug tanos mong pagbarog –

Nagsunod kanimo ang baliko nga anino?

Hunonga na ang pagpahimulos sa kabtangan

Nga gipanag-iya sa kinaiyahan. Undanga na

Ang pagpangawkaw sa kaban sa kagamhanan.

Kay ang lungsod maningil baya kanimo.

Diin hangtod sa imong pagkatulog

Sungogon ka sa daotang mga damgo.

Matapos ang inyong pagpahimulos

Sa kabtangan nga gipanag-iya sa kinaiyahan?

Unya na ba kon manggawas na ang asopre

Sa mangliki nga yuta ug tunawon

Ang Paraiso nga gisaad sa Makagagahom kanato?

Nga kita magpahipi na lamang landong sa kangitngit?

(Bug-os ang pasalamat sa  KAHAYAG  ngadto sa nagpaambit  nga si  TEOFY B. DEL MAR nga kasamtangang nanimuyo sa dalan M. Ceniza, Maguikay, dakbayan sa Mandaue. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI", Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug  tinguha mao ang pagpalambo sa pinulongang Binisayang  Sinugboanon ingon man sa  arte ug kulturang Binisaya. Daghang bangga sa panulat ug balak ang malamposon niyang nalambigitan. Ang iyang  kainila sa natad sa balak ug pagkamagsusulat ginamit ang pinulongang binisaya nakakulit na sa iyang pangalan sa hawanan sa mga bantogan.)