Kaban ni D_BystandeR: NAKADALIKYAT SI P-NOY SA HAYA NI NOY KITO SA SUGBO???

Gitaho nga si Pres. BS Aquino mitambong sa haya ni ALU-TUCP founder Democrito Mendoza, (01/19/16), sa Mariners Court kinsa iyang giisip nga tinuod nga labor leader ug usa ka guerilla warrior. Nipundo lang ug 30 minutos si Aquino kauban si House Speaker Belmonte, Executive Secretary Rene Almendras ug Cebu Governor Hilario  Davide III. Nakig-istorya si Aquino sa mga nailo nga pamilya sa nitaliwang labor leader ug pagkahuman nagpahulagway kini uban kanila dayon mibiya sa haya ug wala na magpa-interbyo sa media. Kauban usab ni Aquino ang iyang PSG ug pipila lang ka Presidential Media Staff nga nibabag sa mga sakop sa media nga gusto unta nga makahinabi sa pangulo kay kuno personal niya ang katuyoan ang pagduaw sa haya ug dili opisyal nga lakaw. Gawas ni Aquino, si Vice President Jejomar Binay uban sa iyang mga senatorial bets Atty. Allan Monsanto ug Leyte Representative Martin Romualdez ang nakaduaw na sa haya. Ihatud sa katapusang pahulayan si Mendoza karong Enero 23 sa hapon didto sa ilang luna sa Papa Kit's, sa Liloan.  "Request gyud  na ni Papa nga adto siya ilubong sa place where he was born. We have already  complied with the requirements for him to be buried there," matud pa sa batan-ong anak ni Mendoza, si Party-list Rep. Raymond Mendoza.

Footnote: Kining balita nga nagsugid sa pagduaw ni Pres. BS Aquino didto sa haya ni ALU-TUCP founder Democrito Mendoza kinutlo gikan sa mantalaang Banat News, sa iyang gula niadtong Enero 20, 2016.