B I S I T A

BISITA

kini mao'y pagduaw,

pagtambal sa kamingaw,

sa pagbisita ikaw mahibalo,

sa tukma'ng pahibalo,

gikan sa gibisitahan,

kasingkasing daw giduyan,

kon pulong sa gugma ang  hisgotan,  

ang pagbisita, katumanan sa lawom ug katuyuan…

 'Day, sayo kaayo ko'ng namisita, ikaw ang ipamahaw sa gugma ko'ng nagduhiraw.'

'Dong Lapoy, sayod ko sa imong kasayo, apan nagkabaiwas gyud mo ni Tirso Kugihan nga kagabii pa'ng namisita, nagpakorte ra gud siya sa iyang bigote kon angayan na ba.'

'Unswaa? unya angayan?'.

 'He,he, ambot lang, pero karon ko pa lang nasayran, mamunga gayud ang kakugihan, nasayran ko ang nagpahipi nga kamatuoran sa bigote ni Tirso nga iyang sinaligan, pinaagi sa pamisita'ng mabuntagan, iyang naablihan, ug akong natagamtaman, ang gugma'ng tinambalan.'

'Ngeek.! huyhoy ang abaga ni Dong Lapoy, nahisama na lang siya sa usa ka itoy, nagpakitoykitoy sa pangandoy'ng nasiyakoy…