NANGUMPISAL SI DONG TIBOR

NANGUMPISAL SI DONG TIBOR

"Sige na mangumpisal man kaha ka Dong Tibor." pulong sa pari.

"Unsaon ko man niini Padre nga dili man ko kapugong sa pagkahimabaye. Nakonsyensya na kaayo ko. Gihasol na kaayo ko sa akong tanlag. Luoy na kaayo ko's akong asawa." mabasolong pamulong ni Dong Tibor, ang numero unong mangtas sa pagka tsekboy sa Junquera.

"Salamat Dong Tibor nga nakaamgo ka sa imong kabadlongon. Hala, Dali sugdi na ning mosunod nga pangadyeon nimo aron mahugasan ka sa imong mga sala. Mahunong na imong kahimabaye. Makapalit ka na pud ug purol, unsaon gasige ka na man lang ug hatod sa imong kinitaan sa pagkakargador sa imong bisyo. Gasige ka na man lang ug yampungad sa kidlapkidlap." nataas ang maymay sa pari ngadto ni Dong Tibor.

"Pero, Padre, sabta intawon ko. Ako rang konsyensya ug tanlag akong palimpyohan. Ayaw intawon ko pahununga sa pamabaye oy. Nabawo man gani kog bantay sa akong suki sa kidlapkidlap." nangatarongan si Dong Tibor.

"Ngano man?" nahibulong ang pari.

"Dako na kaayo kog gasto Padre. Unya siya ra ba pud ang imong tiniman-an. Wala ka kahibalo magsunod ra ta. Kato bang babaye nga puwa kaayo ug wait, pinayungyong ang buhok unya kusog kaayo moipis ug beer sa imong baso. Kato siya. Mabahinan gani ko niya ug sinsiyo kanang makuotan niya imong pitaka. Kanang mahubog naka."

" Apan ngano nga imo man kong gisultian?" sukmat sa pari.

"Unsaon Padre, gusto man ko nga malimpyohan ko nimo nga dili nako makonsyensya ug tulisokon sa akong tanlag matag dawat pud nako ug sinsiyo nga makuot sa imong bulsa nga ipahat sa akong babaye sa kidlapkidlap." pulong ni Dong Tibor.

"Unswaa? Hala ayaw’g lakaw kay lumsan tika’s bendita kanahana ka" (kataposan).