SA TUIG 2019, SUGATON TA ANG MGA BABOY

Tik, tak, tik, tak...2019 nagsingabot na…

ang taknaan nagpangatagak,

may mga saad nga namulak,

may nabahaw ug napan-os,

mga pasalig nga napaltos,

luyahong minuto ug segundo,

miagunto, gikusokuso,

tuig 2018 nagkaawop na,

nagkalanay sa atong mga mata,

tuig sa mga nag-iwik nga mga baboy,

mga tiyanon, sa mga mahiligon magsige’g kaon ug baboy,

panahon na kini, aron mapamatud-ang,

bisag may gibug-aton apan kugihan…

tik, tak, tik, tak...

maampingong nangandam, ang baboy, alang sa 2019,

kakugihan niyang muongad, mokitkit ug mohabhab,

talan-awon sa buhat nga walay kinutuban,

bag-ong panaad gipangladlad,

sa kasingkasing gibukhad,

pagkamabinantayon hingosgan,

pakiglambigit sa kinabag-an,

paghinultol sa buluhaton,

kakugi, kahibalo'g kamadasigön,

itanom, atong bugtawön….

tik,tak, tik, tak...

sa atong kamot,

sa atong paningkamot,

mautingkay ang nagpaabot,

sa atong pagbuot,

mahimong maharuhay ug maalimuot,

ang gipangandaman tang umaabot…

sa tuig 2019,

tubagon ta ang mga pangutanang nagpaabot

iladlad ta ang agianang gipanglukot

hala pasudlon ta ang mga baboy, panid-an ta ang muabot….

tik, tak, tik,tak...

KAHAYAG