Kaban ni Geraldine - S U N O G

SUNOG

 

Pagsilaab sa wala damha'ng kalayo

Naghaguros sa kabangis nga kainit

Nikuyanap ug niabante ang mabagang aso

Unsa ba kini? Mugna sa kalangitan kaha?

O silot sa way pagpakabana o sa mga nagdukaduka.

                             

Sunog - makalilisang kining panan-awon

Walay gipili ang iyang lumpagon

Apan ang mga kabos Kanunay'ng hadlaon

Sa malupigon ug nagbagang lit-ag

Sama sa serpente nga andam sa pagtukob.

 

Kabalaka ug kakurat - daw dili katuhu-an

Alaot ang  mahasi niining kalayo'ng lampingasan

Kay kaparotan ang sangpotan, hagit sa kapalaran

Ang mga pangandoy nahanaw, nahimong aso ug abo

Pag-antos nga hilabihan ang bunga'ng maani.

                    

Singot ug luha miagas sa panagway'ng magul-anon

Mabug-at ang kapaitan ug  kasubo Nga gipas-an

Ihangad sa langit - mga pagmahay,  ug danguyngoy ipabati

Pangaliya sa Kahitas-an, ang kaparotan ipanghilaba

Panghinaot nga mabisbisan sa kaluoy ug bulahanong grasya.

 

Dios Ko! Dios Ko! Nabati mo ba ang mga panghupaw?

Mga hilak sa tago niining dalan nga hagip-ot

Ipabati ang imong kaluoy ug hupaya ang dugha'ng nagbakho

Abliha ang ganghaan sa imong malumo nga kasingkasing

Ipadayag ug idulot ang imong bulawanong bahandi.