SI TARZAN IKOGAN

Si Tarzan

“Tan-awa si Tarzan basa kaayo. Nakalarga na ang lantsa nga gisakyan ni Tatay Indong nimo. Niubog na pud ni sa dagat aron pagsunod ug langoy sa lantsa.” pulong pa ni Nanay Indang nga nagtingsi sa gipakitang dili kasarangan nga lihok ni Tarzan.

“Bitaw Nay, ambot ba niining Tarzan nga wala man gayud kapoya sige ug ubog sa dagat aron paglangoy sunod sa lantsa nga sakyan ni Tatay matag biyahe padulong sa laing isla. Maayo gani kamao pud ni siya mohunong sa pagsunod kon medyo layo na sa baybayon unya mobalik ra pud siya ug langoy padulong sa daplin. Sige Nay ari sa ko. Manugway pa ko sa kabaw.” dali nakong biya para pag-atiman sa akong buluhaton sa umahan sa among yuta sa Poloyagan, sakop sa lungsod sa Pagadian (karon usa na ka dakbayan).

Tuig kadto 1965, daghang katuigan na ang nakalabay apan lunhaw pa gihapon sa akong panumdoman ang iyang sinaw nga balhibong puti, taas ug barog, lapad iyang mga dunggan nga daw palabad sa bintelador, hatay ang panglawas ug ang tabas sa iyang baba kon monganga daw makatukob ug bunga sa lubi nga wala pa bunti, lanog kaayo ang iyang pinaghutan kon dunay katingad-an sa palibot labi na kon mohabol na ang mabugnawong kagabhion. Gikan sa akong pagkagamay nga bata, wala na gayud ko kakita pa ug iro nga susama ug barog ug kadili kasarangan nga manlihoklihok sama ni Tarzan. Makigduwa siya, makiglumba ug dagan, molamano ug mobarog kon sugoon. Ug makamao manluod, kay daw magluha ang mata kon kasab-an unya mohigda nga maghinuktok.

Usa ka adlaw niana, nakahuna-huna si Tatay Indong sa pagdala ni Tarzan sa laing isla aron pud kini makasuroy kay anad man kaayo ug wala magpakita ug timailhan nga mamaak ug mga tawo o mamugno ug sama kaniyang iro. Tuod man, si Tarzan gihigtan ug kadena nga gihigot dapit sa luyo nga bahin duol sa makina sa lantsa. Ang biyahe nilungtad ug upat ka oras.

Sa dihang kuhaon na unta ni Tatay Indong sa iyang nahimutangan si Tarzan, wala na kini ug kadena na lamang ang nahibilin. “Kaluoy ni Tarzan, nalumos na gyud to. Kadako gyud sa akong pagmahay. Maayo pay wala nako to dad-a.” magul-anon nga pulong ni Tatay Indong sa kaugalingon. Wala na gayud kami makadungog pa bahin ni Tarzan human niadto.

Nilabay ang unom ka kabuwan gikan niadto, samtang naglakaw si Tatay Indong padulong sa baybayon sa silingang barangay aron pagpalit ug isda tuwaonon, nadapit ang iyang pagtagad sa saba kaayo ug lanog-lanog nga paghot sa iro nga gihigot ilawom sa punoan sa kahoy nga mansanitas duol sa baybayon. Wala makapugong si Tatay Indong, giduol niya ang iro. Iyang nasampit, “Tarzan!”

Sa iyang kahikurat, ang iro nipakitiwkitiw dayon sa iyang ikog, ug hapit siya makabay-i niini sa paghangop kaniya. Sa dihang iyang gihikap ang ulo sa iro, gibawsan ug tilap-tilap sa iro ang iyang kamot.

Wala makapugong si Tatay Indong sa gibating kalipay. Gitutokan niya ang iro. Bisan bulingit kini tan-awon tungod sa pagka-way ligo apan tataw gayud nga puti ang bulok niini. Gikumbirahan sa dagkong kuto ang lungag sa dunggan ug gisugdan na ug kitkit ang mga kiting sa kagid timaan sa pagkaway atiman.

“Pare Indong, basin ug paakon ka sa iro. Ayaw na ug hikap-hikapa.” tingog sa lalaki dili layo sa nahimutangan ni Tatay Indong nga nikuha sa iyang pagtagad. “Oi, Pare Biyato, ikaw man diay ni. Kining iroa nga gihigot dinhi sa ilawom sa kahoyng mansanitas, mao kini ang akong iro nga nawagtang. Tan-awa dili ba nihangop siya nakakita nako labi na kon akong sampiton ug Tarzan.” malipayong pulong ni Tatay Indong.

“Sus, kanimo pre, dad-a na nang iroa oi. Akoy gisabaan ana dinhi magabii. Ako nang nabangalan sa lawod unom na ka buwan ang nilabay. Akong ginganlan na ug Bangal. Sige pre Biyato. Salamat kaayo. Karon dayon akong dad-on si Tarzan.” (KATAPUSAN)

Nigawas sa Banat News kining maong sugilanon kaniadtong Septembre 15, 2012, pamantalaang binisaya sa dakbayan sa Sugbo.