ANG PAGSUWAY NI ARMAN

Si Boybay nga maoy gisangunan sa pagbuhat sa invitation cards nahuamn na sa iyang tahas. Ug si Dodong 

Detalyado kaayo ang pangandam sa mabulokong paghiusa sa kasing-kasing nila ni Arman ug Sheila. Nalukop ang listahan sa mga pinasidunggan ug hamiling mga bisita sa ilang lungsod sa San Bartolome nga mga yutaan, asindero, tigpatanto, tag-iya ug mga dagkong tindahan.

Si Boybay nga maoy gisangunan sa pagbuhat sa invitation cards nahuamn na sa iyang tahas. Ug si Dodong Budlat, ang bantogang mananahi ug “trahe de boda” malipayong nihatod sa iyang tinahi ngadto ni Sheila nga nakapatulo sa luha sa kalipay sa pagkakita niini. Si Arman nisamot kaambongan sa iyang “made to order” nga barong. Sa ilang pamayhon, kutis sa panit, pamarog, ug hulma sa lawas, daw nga modernong Adan ug Eba ang hunahuna sa makakita kanila labi na kun mosugod na sila sa ilang hinagwaay, ginitikay ug talidhay matag human nila og ensayo sa pagpaso sa simbahan.

Mibagting ang celpon ni Arman.

“Hello,” mitubag siya. “Arman, unyang hapon, mga alas kwatro paabuton ka namo diri sa balay kay duna tay dyutay nga panagsultihan mahitungod sa inyong umaabot nga kasal ni Sheila,” matud sa amahan ni Sheila nga si Mr. Bertulfo.

Pagkahapon, si Arman naabot na sa karsada duol sa harianong panimalay ni Mr. Bertulfo. Human og parking sa iyang kotse, nisulod siya. Sinati na kaayo siya sa lugar. Kay wa man i-lock ang pultahan sa gate nisulod siya. Sa pagtangka niya sa hagdanan sa unang andana sa balay nila ni Sheila maoy misugat kaniya ang manghud nga dalaga sa iyang pangasaw-onon nga si Olga.

“Arman, maayo kay niabot ka. Dugay ra kong naghulat niining higayona kay duna koy mahinungdanong isulti kanimo,” luray nga tingog inubanan sa tam-is nga pahiyum gikan ni Olga ang mitimbaya ni Arman. Bisan distansya ang iyang nahimutangan, nahanggap ni Arman ang alimyon sa agwa ni Olga. Nipis ang gisul-ob ni Olga. Tataw kaayong nilutaw ang nag-ugdo nga dughan ni Olga, nanulisok sa iyang maukiton nga tinan-awan. Nanginit si Arman. Nagpanlad-ok. Nituyhakaw sa iyang galamhan ang kahinam.

“Hmmm ... nianhi ko kay dunay importanting tuyo si Papa nimo,” naghangos si Arman nga namulong.

“Wala si Papa karon. Dunay dinalian nga giasikaso,” tubag ni Olga nga pilit kaayong nitutok sa mga mata ni Arman.

“Arman, crush baya tika. Busa sa dili pa mo hiusahon sa akong maguwang, please ... magtagbaw usa ta sa usa’g usa. Akong ihatag kanimo ang lawasnong kainit ning katapusang adlaw sa imong pagkaulitawo isip akong gasa kanimo. Sunda ko diri sa lawak. Dali na ready to eat na ning akong giandam nimo. Wala gyuy sagabal kay ako nang gihawanan daan aron dili ka atsihon kun mangilaw ka. Apasa ko diri sa lawak nako ha,” dayong biya ni Olga nga naglakaw padulong sa lawak.”

Nagdibal ang hunahuna ni Arman. Apan duna siya’y nahunahunaan nga sulbad sa maong hagit sa panahon. Tulin nga nibalik si Arman sa iyang kotse. Duna siya’y gikuha nga iyang gitipigan sa “compartment” sa iyang kotse. Dili mahimong pakyason niya ang hangyo ni Olga ug kini matuman lang pinaagi sa iyang gidala nga iyang gisulod sa iyang bulsa.

“Pagbantay Olga, kay dunggan ra gyuy way labod nimo. Tan-awon nato og dili ka ba magpanawag og bombero aron pagngon kining kagil-as nakong nagkayo-kayo. Hehe, I shall return.”

Puwerting nakabungisngis og tingsi ni Arman sa iyang kaugalingon samtang nagpadulong balik sulod sa panimalay. Apan igo palang gayud nakasulod si Arman og balik, niguho na si Mr. Bertulfo nga mapahiyumong nitunol sa iyang tuong kamot.

“Congratulations kanimo Arman! Nakapasar ka sa gihimo nakong pagsuway kanimo. Dili ka gayud matintal ug angay kamo ni Sheila sa usag usa.” Ug naglamanohay sila si Arman ug Mr. Bertulfo.

Luyo sa hunahuna ni Arman dako kaayo ang iyang pasalamat nga wa dayon siya mosunod kang Olga dili aron balibaran ang tanyag sa dalaga ngadto kaniya kun dili aron pagkuha sa usa ka putos nga “Condom” nga iyang gitipigan sulod sa iyang kotse.

Kun dili pa tungod sa “Condom” pagkadako unta sa eskandalo ang iyang mahiagoman.

(Kataposan)