Kaban ni Richard: MAG-UUMA

Matag gitib sa silaw sa adlaw,

diha nianang harianong sidlakan,

nga ang mga langgam siloy nanaghoy,

sa kamaya sa ilang saloma,

nga maoy magdadasig sa naghuyhoyng abaga

sa usa ka mag-uuma.

Daro og guna,

gikabiba kang tatay og nanay,

kalaay og kakapoy wala panumbalinga,

taliwala sa makapagba nga kainit,

alang sa tinusbawan,

sa mahayag nga ugma.

Pagtughang, maoy labing halang,

sa daro paga sukgayon,

sa kalabaw pagabirahon,

tipaka sa mga bugon molit-ad,

mga sagbot mga pilay,

kang nanay pagaponpunon,

ning yuta tang tabonon.

Uma, pagaukayon,

mga tipaka sa bugon pagadugmokon,

hangtud sa kahaponon,

 pagasubayon, nga sa huyohoy misandoloy,

 sa nagkaagbon nga kalawasan.

Panuig, panginero og pangulilang,

sa mag-uuma pagahulaton, ulan pagahandumon,

binhi pagaandamon,

uban ang pangindahay,

nga buligan sa labaw ta nga bathala,

kining kabos nga mag-uuma.

(Bug-os ang pasalamat sa KAHAYAG ngadto sa nagsulat sa garay nga si  Richard “Ondo” Paghasian, nga nanimuyo sa Casuntingan, dakbayan sa Mandaue. Magsusulat siya ug magbabasa ug mga balak gani, nahimo na usab siyang kampeyon sa  lain-laing bangga sa balak nga iyang gisalmotan.)