BINARIL ANG KUWARTA SA KONGRESO???

BINARIL ANG KUWARTA SA KONGRESO???

“Mabuhi ang atong buotan nga magbabalaod! Mabuhi kitang tanan!” singgit ni Adoy ang nabantog nga tigpaila sa probinsiya.

“Salamat kaayo Adoy, wala ka gyud molubad. Ang imong tingog sipa kaayo. Pagkasuwerte ko baya nga nakakuha nimo isip tigpaila.” pulong dala pagdayeg gikan ni Gabino Ang, ang magbabalaod sa unang distrito sa probinsiya sa Panangpiling.

“Ikaw ang among paglaum, Kongresman Gabino. Palihug ayaw kami’g pakyasa. Daghan na ang namabdos sa mga maayong musaad. Apan sa akong tan-aw nimo, ang dangas nimong agtang, ang imong pamustura, usa ikaw ka halangdon nga bugtong makahaw-as sa linugaw natong karsada, ug gubaon nga tulonghaan sa atong kabataan.”

“Kana lang diay, ayaw kabalaka Adoy, ug kamong tanan nga madasigon kaayong naminaw sa akong pakigpulong. Dili ko kamo kalimtan, dad-on ko gayud kamong tanan sa paraiso sa akong mga damgo sa atong distrito.”

“Pagkatam-is ba nimong manabi Kongresman. Makabuhi ka man sa gilawalawaan namong mga pangandoy.” pulong pa ni Diding nga lab-asera.

“Bitaw, Kongresman ako pud nagtuo baya ko nga dili ka manapi. Hinayon ka man ug tingog, hinayon pud ka molakaw, manggiikogon ka. Unya, matinahuron pa gyud namo. Kanunay kang motawag namo ug haring lungsod. Mobukad gud ang akong atay kon makadungog ko nimo sa imong diskurso.” padayag usab ni Noy Bagdoy, nga palainom ug tuba.

“He, he, he, sa ako nang giingon, dili kamo mabalaka, iapud-apud nako kaninyong tanan ang akong kaayo. Buhion ko kamo sa kaigmat nako sa pagpanday ug mga balaod sa kongreso. Andam ko’g tagana sa akong pahat sa baril sa kuwarta nga akong koprason alang kaninyo.”

“Unswaaa? Unsa’y koprason? Unsa’y baril sa kuwarta? Binaril diay ang kuwarta sa Kongreso?” pangutana pa ni Adoy.

“Sus, kanimo Adoy, dili lang binaril, puwede pa gani nga maglunang ka sa bisyo kon ikaw walay prinsipyo. Maayo gani abtik kaayo ko ug maantigo pa gyud. Ayaw lang ug kabalaka, kuwarta kini ninyong mga magbubuhis nga akong ibalik kaninyo pinaagi sa daghang proyekto. Hala dili lang ko magdugay ha. Basin ug malangan pa ko sa akong flayt padulong sa Manila.”

Paglabay sa pipila ka bulan.

“Kamingaw baya. Wala man koy nakita nga tilimad-on nga naglusad ug proyekto sa lungsod si Kongresman Gabino.” Minghoy si Adoy.

“Bitaw, lunlon saad lang gyud ang iyang gihatag nato. Busog na kaayo ko sa iyang saad.” ni Noy Bagdoy pa.

“Ako pud, kanyahay na lang nga kas kaayo kog lipstik ug pulbos. Abogon ug libaongon kaayo ang karsada. Hain na man diay ang binaril nga kuwarta sa kongreso pulong pa ni Kongresman.” dugang pa ni Diding.

“Balita, balita”. Tingog sa magsisibya sa Radyo Bitaybitay ang mibuak sa panagkukabildo sa mga managhigala.

“Maminaw ta.” Agda ni Noy Bagdoy.

“Ang binaril nga kuwarta sa kongreso gibulsa sa atong mga pinili ug halangdon nga mga Senador ug Kongresman, usa na sa nakapaburot sa iyang tiyan ug nakapahimulos niini mao si Kongresman Gabino Ang.”

“Oy, palonga ang radyo. Sus, pagkadimalasa bayaaa. Daghang saad apan bunga lang diay sa lingla ang tanan.” nahugno si Adoy.

“Daan pako, ikaduha na karong tirmino ni Kongresman pero ang mga bag-ong niyang kotse naghuot sa iyang garahe. Luho kaayong mamisti apan may gitagoan diay’ng baho.” paapas ni Noy Bagdoy.

“Mao gyud, pero panahon gani sa piniliay halos moluhod na lang sa atong atubangan, magpakilooy.” dala kapungot nga pamulong ni Diding.

“Ay sala pud ni natong tanan, modawat man gud ta ug sinsiyo matag piniliay.” sumbalik ni Noy Bagdoy.

“Kamo gyud, dili ta motahan sa atong paglaum oy. Ato ni silang ipapulis.” ni Diding.

“Unsay pulis? Napoles? Katong mantaga nga nagpahatpahat kuno sa salapi sa katawhan?” maitokong mga pangutana ni Adoy nga nagngisi. Salig kaayo siya sa kaugalingon sa pagpasupot sa mga pangutana’ng daw nakatuhog sa uyok sa estorya.

“Ay sige lang, duna man koy nasayran nga ipaimbestigar kuno ang mga kiriwan.” tubag ni Diding.

“Naunsa ka Bagdoy? Mitibi ka man gud.” dala kahibulong nga pangutana ni Adoy.

“Naglibog ko mga amigo. Unsaon na man lang nato kining panghitaboa? Ang goberno sige ug panakop sa mga mamuhunan ug harina kay wala konoy bayadbayad ug buhis maong nimahal atong pandesal. Ang mga gagmay’ng negosyante sa gasolina, gipanakop kay wala kuno mobayad ug buhis. Maong gasige na lang pud ug saka ang presyo sa mga lana. Dili pa lang dugay, usa ka negosyante ug bugas gidakop kay palusot kuno. Pero kining atong mga halangdon, mga pinili nga maayo kaayong mosaad sa katawhan, nag-iyahay man lang diay kini sila ug panapi. Kini sila ang angayan gukdon, silang tanan nga nagtago sa mga luho kaayong bisti ug harianon nga mga panimalay. Gihimolbolan nila ang kaban natong mga katawhan.” nanglugmaw ang luha sa mga mata ni Noy Bagdoy. Minghoy.

“Mosaad kong dili na ko magtulog-tulog pa sa pansitan. Maghugpong ta. Magunitay ta. Pangitaon ta ang tul-id nga dalan.”

Niining tungora, mitikyop na ang kagabhion, magbuwagbuwag na sila apan miturok sa tagsa-tagsa nila ka kasingkasing ang paglaom nga matul-id pa ang dalan nga ilang giatubang ug sa umaabot pa nga kaliwatan. (KATAPUSAN).