Kaban ni Atty. J. B. Jimenez: KATAPUSANG TUGON NI TATANG . . . . .

KATAPUSANG TUGON NI TATANG . . . . .

I

Nahasulat sa Papel Nga Karaan,

Sa Ilawom Sa Giyawihang Kaban,

Ang Mga Tugon Sa Usa ka Ginikanan,

Nga Naga Mahal Sa Anak Nga Tanan.

II

Ang Mga Mangga Usa Ka Gatos Ka Punuan,

Akong Ibilin Sa Pinalanggang Kamagulangan,

Ang Yuta Kon Diin Gitanom Ang Kamanggahan,

Adto Ipasunod Sa Minahal Ko Nga Kamanghuran,

III

Ang Dako Ko Nga Kahumayan,

Sa Ikatulong Anak Kong Sinaligan,

Apan Ang Yuta' Ko Diin Ang Tinubdan,

Sa Ika-upat Ko Ihatag Apil akong Kalubihan.

IV

Ang Dakong Balay Nga Karaan,

Ang Ika-Lima Nga Anak Ang Hatagan,

Apan Kanang Yuta Nga Iya Nga Gitarokan,

Ang Ika-Unom Nga Anak Ang Akong Entregohan.

V

Nganong Giingon Ko Niini Ang Paga Bahinan,

Nganong Lain Ang Tag-iya Sa Tanom Ug Gitamnan,

Lain Ang Tagiya Sa Balay Ug Lain Usab Ang Gitarokan,

Gituyo Ko Kini Aron Ang Panag Bangi Ilang Paga Likayan.

VI

Walay Manggang Maani Ang Kamagulangan,

Kon Dili Sia Makigdait Sa Yutaang Kamanghuran,

Dili Makatanom Ang Ika -Tulo Sa Iyang Humayan.

Kon Dili Makig Hugoy Sa Igsuong Adunay Tinubdan.

VII

Dili Makasaka Ang Ika-Lima Sa Balayng Gipuy-an,

Kon Iyang Awayon Ang Ika-Unom Tag Iya Sa Gtarokan,

Si Tatang Walay Natapos Nga Taas Nga Grado O Kinaadman,

Apan Labihan, Kalantip Sa Utok Ug Ka Halawom Sa Iyang Kasinatian.

VIII

Ang Managsuon Nagpabiling Nagkahiusa Nga Tanan,

Bisan ang Mga Kapikas Walay Bisan Unsang Gika Bangi-an,

Ang Mga Apo Ug Mga Sungkod Walay Away Ni Mga Paga Ilogan,

Kalipay Sa Dakong Banay, Ug Dungog Sa Mga Mipanaw Nang Giknikanan.

(Bug-os ang pasalamat sa  KAHAYAG  ngadto sa nagsulat sa  garay    nga si  ATTY. JOSEPHUS B. JIMENEZ.   Usa siya ka kanhi Department of Labor and Employment  (DOLE)  Undersecretary, kanhi Vice President, PEPSI COLA PHILIPPINES, kanhi Director for Labor Relations, SAN MIGUEL CORP., kanhi Personnel Director, PETRON ug PNOC, magtutudlo sa kurso sa abogasya sa mga dagkong tunghaan sa Manila sama sa UST, FEU, UE, SAN SEBASTIAN,  kanhi Labor Attache ngadto sa mga nasod sa Malaysia, Kuwait ug Taiwan,  magsusulat sa nagkadaiyang libro sa mga nagtuon sa kurso pagka abogado. Nagikan siya  sa pamilya nga taga Ronda, Dumanjug ug Argao sa lalawigan sa Sugbo. Malamposon kaayo siya sa pagkab-ot sa iyang damgo ug tinguha, ug karon magtampohan sa peryodikong The Freeman isip magsusulat ug artikulo matag semana. Siya ang tigtukod sa grupo sa mga magsusulat nga magtatampo sa grupong LAB-OK  kon  LUNSAY NGA AMBAHAN SA MGA BISAYA SA FACEBOOK)