Kaban ni Teofy del Mar: HAGIT SA DAMGO

Hinumdomi nga ang damgo maoy usa ka kalipay. . .

Ang   katumanan sa damgo dili mo maangkon sa pagkatulog!

Kondili, ang pagbutaw niini samtang namukway sa kalagsik

Ang imong lawas ug diwa. Kinahanglannga ibakyaw mo

Ang mga buktong gibathayan sa mga ugat sa kakugi,

Ug dinhi, maamgohan mo na lamang

Nga ang gibugtaw mong mga larawang dili mahikap -

Makakaplag og dugokan diha sa alampoanan sa kahimatngon.

Sa   banusbanos   nga   pagduaw sa banagbanag ug kilumkilom

Daghan   usab   kaayo ang mga damgo nga manglutaw

Sa    lapyahan   sa kinabuhi.  Ug kinahanglan nga ang imong kakugi

Sa  pagbugtaw    niini, sama ka makanunayon

Sa paghampas sa sa mga balod sa baybayon -

Walay kataspok! Walay kapuol! Ug dili mo pag-ilhon

Nga ang paglantong sa dagat, mao ang kinutoban sa taobon;

Aron   ang   imong   mga   damgo dili magpabiling haguka,

Sama sa usa ka anino nga walay lawas - 

Diha sa nipis ug nag-unaop nga lamdag sa hunahuna.

Gukda ang mga kabakaba nga daw mga dalilang

Nagpaanod-anodsa bugnaw'ng huyohoy.

Sikopa ang anino sa mga alindahaw nga nanglutaw

Diha sa walay timik nga linaw. Kay kini maoy mga damgo 

Nga wa maghulat nga lutason sa kahimatngon.

Timan-i lamang: nga ang tam-is nga katumanan sa damgo - 

Wala diha sa pag-angkon sa mga butang nga imong gimanggad,

Samtang may mga kalag nga maghilak luyo sa imong kadaogan.

Hinumdomi nga ang damgo maoy usa ka kalipay;

Ug dili kini hingpit, samtang ang imong tanlag

Bation pa og kahadlok sa mga anino sa kagabhion.

Ayaw pasagdi nga sa kataposan unyang hunat sa imong mga takna

Ang tahom mong mga damgo, mapusgay 

Ngadto sa makalilisang nga urom,

Kay nagpahaylo ka sa pipila ka tipak nga bulawan.

(Bug-os ang pasalamat sa  KAHAYAG  ngadto sa nagpaambit ning maong   balak   nga si  TEOFY DEL MAR. Usa siya ka tadhan nga magbabalak nga nabantog dili  lamang sa Sugbo kon dili sa ubang bahin usab sa atong nasod. Natudlo siya isip pangulo sa inilang hugpong sa mga  magsusulat ginamit ang pinulongang binisaya, "LUDABI" (Lubas sa Dagang Binisaya nga natukod kaniadtong 1956 sa mga magsusulat, magsisibya, ug mag-aawit nga Bisaya sa Dakbayan sa Sugbo kansang panlantaw ug tinguha mao ang pagpalambo sa pinulongang Binisayang Sinugboanon ingon man sa arte ug kulturang Bisaya.). Daghang bangga sa panulat ug balak ang malamposon niyang nalambigitan. Napatik na kining maong balak  kaniadto sa Bisaya Magasin, binisayang  magasin nga mogula kausa sa usa ka semana)