Kaban ni Geraldine: VIA DOLOROSA

VIA DOLOROSA -  dalan sa kasub-anan

O Via Dolorosa, kini ang ang dalan sa balaang dakbayan sa Herusalem.

 Nganong ato kining gipatik sa alimpatakan ug atong katolikong pagtuo?

 O Via Dolorosa, hain na ang imong mapait nga dalan paingon sa Golgotha?

 Agianan nga gibaktas ni Hesus sa kapaitan ug Dili matukib nga kalisdanan.

 Gikan sya gihukman ni Poncio Pilato mga nanghunaw sa Iyang mga kamot:

Tungod kay sa iyang  Romanong pagdumala sa nasod sa mga Hudeo,

 Kay wala siya'y nakitang timaan sa mga pasangil sa atong Manunubos.

Apan ang mga Phariseo sa Templo mipadayag ug  dako'ng kaligutkot,

 Ug ang mga Hudeo misyagit ug kusog; "ilansang cya sa cruz!"

 Ilansang! Ilansang sa cruz! Mao'y pulong nga nibaniog ning adlaw sa kasakit=

 Higusgahan, gibiay-biay ug gidagmalan ikaw,  o malumo nga Hesus.

 Kasubo ug kasakit ikaw gilumsan. O Herusalem,  unsa ma'y hinungdan?

 Kay kining dapit sa may silangan'g ganghaan sa Templo, bungtod sa Moriah,

 Dinhi sa lugar gibantog sa kanhiay'ng panahon ang pagsulay ni Abraham,

 Nga ihalad isip sakripisyo iyang pinalanggang anak ngadto sa Diyos Amahan.

 Ug busa niining maong dapit, gihusgahan  ang balaang bugtong Anak.

 Ang kordero sa Diyos, nga nagwagtang sa mga kasal-anan sa kalibutan.

 Ang mga sundalong Romano gitahasan sa pagkastigo kanimo, o Hesus;

 Ug sa mga tampalasang kamot gitumod nila ang cruz ug gipas-an mo,

 Sa walay pagdumili ug kasilag nga gibati sa imong malumo'ng kasingkasing.

 Kabug-at ug kasakitan giantos, sa imong  abaga ang cruz gisapnay mo.

 Ang imong matam-is nga nawong naputos sa dugo ug singot mga miagas,

 Nagagikan kini sa mga samad sa mahait nga tunok sa imong ulo.

 Tungod kay sa tunukon nga korona ikaw gipurong-purongan ug giyam-iran.

 O Hesus nga Nazareno, ikaw giambayahang hari sa mga Hudeo.

 O Via Dolorosa, dalan sa imong kasub-anan, napandol apan ikaw mipadayon:

 Aron ang propesiya ni Isaiah may katumanan: "Sa iyang  mga samad" -

 Among mga kasakitan, kasal-anan, ug  paglapas sa kabubut-on sa Amahan,

Mapapas, mahanaw ug matubos ang tanan diha sa cruz imong gipas-an.

 Sa imong balaang dugo - gihugasan mo ang among kasaypanan

 Aron maluwas sa pagkodinar sa hustisya sa Dios, ang Leon sa Judah.

 Via Dolorosa, dalan'ng saksi sa matag lakang mo O Hesus.

 Ang dalan diin nagkasugat kamo sa imong mahal'ng  inahan nga si Maria,

 Ang iyang mga luha ug kasubo mas labi pa hinoong mipasakit kanimo.

 Ug sa puting panapton gitrapohan ni Veronica ang nagkadugo'ng panagway.

 O dalan sa pagkahugno ug paghisukamod ni Hesus sa duha ka higayon;

 Daw sa dili na maantos, sa iyang mga abaga gikuha ang cruz sa sundalo'ng Romano,

Ug gipa pas-an  ngadto kang Simeon nga aron lamang ikaw makalahutay;

 Padayon sa pagtadlas niining dalan paingon sa bungtod sa Kalbaryo.