SA TUIG 2018, SUGATON TA ANG MGA IRO

Tik, tak, tik, tak...2018 nagsingabot na…

ang taknaan nagpangatagak,

may mga saad nga namulak,

may nabahaw ug napan-os,

mga pasalig nga napaltos,

luyahong minuto ug segundo,

miagunto, gikusokuso,

tuig 2017 nagkaawop na,

nagkalanay sa atong mga mata,

tuig sa mga nagtuktugaok nga manok,

mga hinayon, mga mahilig magminanok,

pag-ilaid sa mga damgong napulak gitagamtam,

nagpasad sa atong pagpadulong sa unahan..

tik, tak, tik, tak...

maampingong nangandam, ang iro, alang sa 2018,

kakugihan niyang mamaghot, tataw’ng may gipaabot,

bag-ong panaad gipangladlad,

sa kasingkasing gibukhad,

pagkamabinantayon hingosgan,

pakiglambigit sa kinabag-an,

paghinultol sa buluhaton,

kakugi, kahibalo'g kamadasigön,

itanom, atong bugtawön….

tik,tak, tik, tak...

sa atong kamot,

sa atong paningkamot,

mautingkay ang nagpaabot,

sa atong pagbuot,

mahimong maharuhay ug maalimuot,

ang gipangandaman tang umaabot…

sa tuig 2018,

tubagon ta ang mga pangutanang nagpaabot

iladlad ta ang agianang gipanglukot

hala pasudlon ta ang mga iro, panid-an ta ang muabot….

tik, tak, tik,tak...

KAHAYAG